Siglir tar il cuntegn
Inhalt

Chantun Malgrà l'euro bass, las grondas firmas grischunas n'han betg patì

Anc avant in mez onn temevan las grondas interpresas grischunas las consequenzas da l'aboliziun dal curs minimal da l'euro.

Logo da Hamilton e bandiera svizra.
Legenda: Malgrà il ferm franc ha la Hamilton a Panaduz fatg bunas fatschentas ils davos mais. Keystone

Schebain Magdalena Martullo-Blocher, scheffa da la gruppa EMS-Chemie, sco er Andreas Wieland, schef da la Hamilton a Panaduz, quintavan cun perditas dal gudogn. Igl è dentant vegnì auter che quai ch'els han quintà.

La Ems-Chemie venda bler

Cun la bilantscha dad in mez onn ha Magdalena Martullo-Blocher pudì preschentar il fanadur schizunt in gudogn da record. Bain haja la EMS-Chemie fatg in minus pervia da l'euro, dentant haja l'interpresa vendì bler dapli.

Hamilton era sa preparà

Ed er Andreas Wieland da la Hamilton po communitgar buns resultats. La svieuta saja s'augmentada per 10%. Quai cunzunt pervia da restructuraziuns che la Hamilton haja fatg gia en vista a l'aboliziun dal curs minimal da l'euro. Latiers vegnia che la Hamilton haja cumprà en dapli volumen en l'exteriur. Ella na venda pia betg mo en euros, mabain cumpra er dapli en euros. Pli baud era quai 20%, ussa èn quai 70%.

Anc adina paucs dischoccupads

En l'entir chantun Grischun n'haja anc betg dà consequenzas gravantas, di Paul Schwendener, schef da l'Uffizi per industria, mastergn e lavur. Bain saja il dumber da dischoccupads creschida per bunamain 200 persunas, ed er dapli lavur curta saja vegnida annunziada. Dentant saja la quota da dischoccupads dal fanadur anc adina be tar 1,5%, quai valia anc adina sco occupaziun cumplaina.

Quant gravant che l'euro bunmartgà è stà per il turissem na sappian ins anc betg dir. La bella stad possia era avair gì in’influenza positiva sin las cifras dal turissem.