Siglir tar il cuntegn

Chantun Luf M75 è per il mument mitschà

La lubientscha da sajettar il luf en il Grischun è scadida la dumengia passada. 60 dis ha il chantun gì peda da sajettar il luf ch’ha stgarpà ils ultims quatter mais almain 55 nursas en Svizra. Co i va ussa vinavant n’è anc betg cler.

Pausa en il Grischun: il permiss da sajettar il luf aifer 60 dis è scadì senza success.
Legenda: Pausa en il Grischun: il permiss da sajettar il luf aifer 60 dis è scadì senza success. Keystone

Ina situaziun pauc cuntentaivla saja quai, manegia il manader da l’uffizi da chatscha e pestga, Georg Brosi: «La situaziun sco tala pretendess da principi, ch’il permiss da pudair sajettar il luf M75, vegniss ussa prolungà. La basa legala per pudair far quai è dentant fetg restrictiva.»

Ch’i faschess dentant da basegn da pudair ussa prolungar quest permiss da sajettar il luf M75, mussia per exempel il cas a Mustér avant duas emnas, nua che trais tschuts èn vegnids stgarpads. Pertge pli probabel saja quest luf anc adina en il Grischun. Tge che succeda sco proxim en il cas dal luf M75, na po Georg Brosi betg anc dir, cunquai ch’ins saja il mument anc en discussiuns cun la Confederaziun.

Permiss dapi il mars

Il mars passà avevan ils chantuns Grischun e Tessin, sa basond sin l’ordinaziun da chatscha federala, il link avra en ina nova fanestra, decidì da sajettar il luf M75. Quai suenter che passa 40 nursas eran vegnidas stgarpadas aifer be trais emnas en la Bregaglia, en la Leventina (TI) ed en il Mesauc. Analisas da DNA a Stampa, Faido ed a Cama avevan cumprovà ch’i sa tracta dal luf M75. Il mument po il luf anc vegnir sajettà en il chantun Son Gagl ed Appenzell Dador ch’ha decretà oz la disposiziun correspundenta.

RR novitads 17.00