Siglir tar il cuntegn

Chantun Linard Bardill n'è anc betg cuntent

Il co-iniziant da «Kunzt first», Linard Bardill, pretenda che la cumissiun da gestiun dal Cussegl grond vegnia activa.

Legende: Video Linard Bardil pretenda scleriment abspielen. Laufzeit 00:47 Minuten.
Or da sil punct dals 27.07.2017.

Il Museum d'art dal Grischun ha davent dad immediat ina co-direcziun. Per Linard Bardill, il co-iniziant da l’acziun «Kunzt first», n’è questa schliaziun dentant anc betg avunda: «Jau hai spetgà questa schliaziun minimala.» I saja ina schliaziun che pussibiliteschia a Martin Jäger e ses Departament d'educaziun e cultura (EKUD) da salvar la posiziun ch'els han. Il cusseglier guvernativ Martin Jäger aveva communitgà la gievgia che Stephan Kunz saja a partir dad immediat responsabel per la part artistica e Nicole Seeberger per la part administrativa dal museum. Che Stephan Kunz e Nicole Seeberger vegnian da lavurar ensemen dubitescha Linard Bardill.

Setgentar la palì EKUD

Vid l'exempel Kunz vesian ins co las chaussas vegnian schliadas, cura ch'i na dettia naginas reacziuns e nagin squitsch or da la publicitad. «Quai è il sistem EKUD», crititgescha Bardill. El pretenda che la cumissiun da gestiun dal Cussegl grond vegnia activa e sclereschia, co l'uffizi da cultura funcziunia. «Jau spetg che l'entira chaussa EKUD – ch'è tenor mai ina palì – vegn setgentada», uschia Bardill vinavant.

Cumissiun da gestiun pil mument anc inactiva

Per il mument n'è anc betg cler sche la cumissiun da gestiun dal Cussegl grond daventa activa u betg. «La cumissiun da gestiun vegn a s'infurmar en quella chaussa sco tar autras fatschentas dall'administraziun chantunala er ed allura giudicar», ha declerà envers RTR Agnes Brandenburger dalla PPS che presidiescha la cumissiun. Cler saja uss sulettamain ch' ins vegnia a discutar davart la tematica.

RR actualitad 17:00