Siglir tar il cuntegn
cuntegn

Chantun Lia Rumantscha va novas vias per promover cultura rumantscha

La Lia Rumantscha promova durant in onn projects audiovisuals sin la plattafurma da crowdfunding «wemakeit». Cun quest project da pilot va la Lia novas vias en la promoziun da cultura.

Sonda lunga 2014.
Legenda: Sonda lunga 2014. MAD

La Lia Rumantscha sa participescha a l’uschenumnà channel da la citad da Cuira che lantscha ina collavuraziun cun «wemakeit» per sustegnair projects audiovisuals ch'han in connex cun Cuira. En pli sustegna la Lia tals projects en l’entira Svizra.

La Lia Rumantscha sustegna projects audiovisuals rumantschs u parzialmain rumantschs. Quai pon esser gieus auditivs, films curts u producziuns multimedialas. Sch’il project ha cuntanschì 33% da la finamira da finanziaziun, contribuescha la Lia in import da 1’000 francs. L’import restant sto puspè vegnir rimnà cun agid da la crowd. Sch’ils projects han en pli in connex cun Cuira, als sustegna la citad da Cuira cun in terz (max. 3’000 francs) da la finamira da finanziaziun.

RR novitads 09:00

Dapli da «wemakeit»

La plattafurma svizra «wemakeit» è ina da las pli impurtantas plattafurmas da crowdfunding en l’Europa. Dapi sia fundaziun l’onn 2012 èn vegnids sustegnids radund 2’400 projects da dapli che 140’000 persunas cun passa 25 milliuns francs.