Siglir tar il cuntegn

Header

cuntegn

Chantun Lia Rumantscha en nov vestgì

La Lia Rumantscha ha dà giu la clavina rumantscha. La clav dal logo da 1983 è vegnida remplazzada cun trais rudels dad aur che van in en l'auter. Ed era la pagina-web da la Lia Rumantscha è vegnida modernisada.

«Els simboliseschan la cuminanza da las rumantschas e dals rumantschs, là nua che interess ed opiniuns sa cruschan datti communitads, dentant ha mintgin era sia part individuala», di Urs Cadruvi, il secretari general da la Lia Rumantscha. Ensemen cun il creatur dal logo, Remo Caminada, ha el preschentà oz il nov logo da la Lia Rumantscha.

audio
Saira: Lia Rumantscha en nov vestgì
ord Actualitad dals 23.04.2015.
laschar ir. Durada: 2 minutas 16 Secundas.

Betg tuts èn propi persvas

Damai che la clavina è dentant tuttina in simbol ferm, resta ella ensemen cun il claim «per nossa lingua» in simbol independent da la «interpresa» Lia Rumantscha per l’engaschi per il rumantsch.

audio
Bunura: Remo Caminada, il creatur dal logo
ord Actualitad dals 24.04.2015.
laschar ir. Durada: 1 minuta 38 Secundas.

La nova cumparsa na persvada dentant betg tuts dal tuttafatg. Il Radio Rumantsch ha dumandà Gion Fry, manader dad in'agentura da reclama, tge ch'el di dals trais rintgs dad aur. El ha dà in sguard, dentant senza savair, tge strategia che la Lia persequitescha cun il nov logo e tge patratgs ch'il designer ha fatg durant sia creaziun.

audio
Bunura: Valitaziun da Gioni Fry
ord Actualitad dals 24.04.2015.
laschar ir. Durada: 1 minuta 57 Secundas.

Per Gion Fry n’è il logo betg fitg modern ed è era pauc pratic. «Ils rudels èn surdimensiunads en cumparegliaziun cun la scrittira. Quai fa pli grev l'applicaziun dal logo sin differents meds sco cartas postalas u en cudeschs», uschia Gion Fry.

Ina cumparsa pli moderna

Ed era la pagina-web da la Lia Rumantscha è vegnida modernisada. Ella sa basa sin l'interacziun e la participaziun dals utilisaders. Quels pon publitgar sezs lur occurrenzas en in chalender per tut las Rumantschas e Rumantschs sco era metter ensemen sezs lur atgna pagina-web cun posiziunar las fanestras preferidas sin il «pult» virtual.

La finamira da la nova cumparsa è dad animar Rumantschas e Rumantschs da s'engaschar per lur linguatg e da svegliar er en las proximas generaziuns il plaschair vid il rumantsch.

Artitgels legids il pli savens