Adina danovamain vegn ord la populaziun rumantscha il clom da pudair sa participar dapli en dumondas impurtantas per la Rumantschia. Uss ha la Lia Rumantscha udì ils cloms, ella ha laschà far l'expert per democrazia Andreas Glaser in'expertisa.
La finamira saja, che tut las Rumantschas ed ils Rumantschs, era quels e quellas che n'èn betg en la suprastanza ubain en in'uniun affiliada da la Lia, sajan en direct contact cun quella.
Quest contact cun la Rumantschia dovria la Lia per pudair sentir il puls tar Rumantschas e Rumantschs - e per dar enavant quai puls al chantun. Per la regenza grischuna è la Lia Rumantscha numnadamain la rapreschantanta dals Rumantschs. Per avair dapli paisa saja perquai fitg impurtant, che la Lia haja ina basa da referenza lada.
Votaziuns tranter Rumantschs
Ina pussaivladad da sentir il puls saja, che la Lia organisass votaziuns tranter ils Rumantschs cura ch'i sa tracta da tematicas impurtantas. Quai pudess succeder en maniera electronica u scritta.
Pussaivel fiss er, che Rumantschas e Rumantschs survegnan dapli pussaivladads direct-democraticas sco inztiativas ubain referendums. Quai pussibiltass a la populaziun bloccar decisiuns da la Lia Rumantscha.
Co enavant?
Sco Johannes Flury, il president da la Lia Rumantscha, di, dettia il zercladur ina dieta publica per pudair incumbensar l'expert Andreas Glaser pli detagliadamain davart tgenina da las propostas ch'el duai approfundar. Er Flury conceda che «la structura da la Lia n'è ozendi betg pli fitg democratica.»