Siglir tar il cuntegn
Inhalt

Chantun Lescha da vischnancas vegn en il Cussegl grond

La revisiun totala da la lescha da vischnancas vegn avant il Cussegl grond. La regenza grischuna ha deliberà la missiva latiers. Suenter passa 40 onns duai il chantun Grischun survegnir in relasch general modern che duai dar a las vischnancas gronda libertad d’agir.

La vischnanca da Razén.
Legenda: Las vischnancas grischunas duajan mantegnair lur autonomia. (maletg simbolic da Razén) Keystone

La lescha da vischnancas vertenta è ida en vigur il 1974. Tenor la communicaziun da la regenza grischuna saja la lescha sa cumprovada per gronda part. Pervia da differentas revisiuns parzialas è la lescha dentant uss mal survesaivla ed era uschia betg propi legibla pli.

Gronda libertad per las vischnancas

Vinavant mantegnian las vischnancas ina gronda autonomia. Uschia duai en il dretg chantunal sulet vegnir reglà il necessari per tut las vischnancas, scriva il chantun.

Las impurtantas midadas:

  • La suprastanza communala duai pudair decider en atgna cumpetenza sur d’adattaziuns da relaschs communals al dretg superiur.
  • Las sesidas dal parlament communal sco era las radunanzas communalas duajan esser da principi publicas.
  • Las vischnancas burgaisas na pon betg pli excorporar lur facultad, cun excepziun da surdar la facultad a la vischnanca politica.
  • Fusiuns da vischnancas vegnan reglada dapertut tuttina sin basa da las experientschas fatgas. Percunter na duai il chantun betg survegnir ina rolla pli activa en ils projects da fusiun, quai cuntrari a la consultaziun, scriva la regenza grischuna.

Igl è previs ch'il Cussegl grond tractia la lescha da vischnancas en la sessiun d'october 2017. Las novas basas giuridicas duain alura entrar en vigur per il 1. da fanadur 2018.

RR novitads 09:00