Siglir tar il cuntegn
Inhalt

Chantun Lescha da vischnancas è sut tetg

Il Cussegl grond ha approvà la revisiun totala cun 106 tar 0 vuschs e tschintg abstenziuns. La cussegliera guvernativa Barbara Janom Steiner (PBD) empermetta uschia dapli autonomia a las vischnancas.

Il resultat final: La lescha da vischnancas è approvada.
Legenda: Il resultat final: La lescha da vischnancas è approvada. RTR, Prisca Bundi

I saja stà nairas uras per ina revisiun totala, cunquai che la lescha da vischnancas saja passa 40 onns veglia. Quai ha ditg la Barbara Janom Steiner suenter in maraton da debattas.

Dapi glindesdi suentermezdi han deputadas e deputads discutà la lescha da vischnancas, che regla tut ils dretgs ed incumbensas da las 112 vischnancas grischunas.

Las pli impurtantas midadas per las vischnancas:

  • radunanzas communalas daventan publicas
  • vischnancas burgaisas na dastgan betg transferir lur facultad en cas da fusiun
  • il conto per il retgav or da la vendita da terren resta
  • la suprastanza communala sto avair almain trais suprastants

La lescha da vischnancas va en vigur la stad 2018.

RR novitads 18:00