Temps da bloc, structuras dal di, ma surtut las pajas autas per scolastas e scolasts procuran per pli auts custs che planisà. Gia il 2012 cura che la lescha da scola nova è vegnida discutada era quai cler ch’ella chaschunia era pli auts custs. Il 2012 era dentant vegni discutà en il Cussegl grond da custs da 10,5 milliuns francs.
Motivs betg propi clers
En il quint dal chantun per il 2015 (p.33-37) preschenta uss la regenza ch'ils custs èn creschids per 25,6 milliuns francs. Ils motivs per quest augment vegn scrit sin trais lingias. Uschia sajan ils motivs «per exempel» pli autas pajas, novs maina scola, la promoziun da scolaras e scolars da lingua estra, custs da transport pli auts en vischnancas fusiunadas e supplementars scolars da talents. Ma ina glista exacta manca, ha ditg il manader da finanzas tar l'uffizi da scola e sport sin dumonda dal schurnal regiunal da SRF.
Marcant dapli custs
A la glisch è quai vegni pervi che la deputada da la PLD Angela Casanova ha inoltrà ina moziun parlamentara. Uss stoppian tut las decisiun anc ina giada vegnir sut la marella, ha ditg Casanova. Per ella n'èsi betg cler sch'il Cussegl grond vul propi dar ora 26 milliuns francs dapli per onn. Ils 13 da zercladur ha lieu la proxima sessiun dal Cussegl grond.
RR novitads 20:00