Siglir tar il cuntegn

Header

Navigaziun

in crap cun ils rintgs dals gieus olimpics, cuolms, glieud
Legenda: Gieus olimpics a San Murezzan 1948 Keystone
cuntegn

Chantun Lebrument: «Esser cunter gieus olimpics è dubius»

Hanspeter Lebrument ha envidà represchentants da las set vischnancas grischunas, nua ch’i dess gieus olimpics, ed il cusseglier guvernativ Jon Domenic Parolini per discutar davart ils gieus olimpics d’enviern en il Grischun. Per rapportar ha Lebrument dentant envidà mo ils agens schurnalists.

El saja editur da la Somedia ed el miri en emprima lingia per la Somedia, di Hanspeter Lebrument sin la dumonda correspundenta. La finamira saja che ses schurnalists sajan infurmads tge ch’ils represchentants da las differentas vischnancas pensian.

Nagina conferenza da medias

L’infurmaziun haja el organisà sin iniziativa privata. Sche las gasettas n’hajan betg precisà quai, saja quai la culpa dals schurnalists. Er il cusseglier guvernativ Jon Domenic Parolini na vesa nagin problem da sa participar ad ina tala occurrenza, malgrà che naginas autras medias eran da la partida. El haja dà in’orientaziun ad in gremi.

Nagina neutralitad

Hanspeter Lebrument è fieu e flomma per gieus olimpics d’enviern l'onn 2026 en il Grischun - e sustegna perquai ils aderents. Adversaris n’envidass el dentant betg en sia chasa da medias. El na chapeschia betg, co ch’ins possia esser encunter gieus olimpics, quai saja dubius.