Siglir tar il cuntegn

Chantun Lavur curta pudess gidar manaschis turistics en il Grischun

Manaschis turistics grischuns s'infurmeschan davart lavur curta. Visavi il schurnal regiunal dad SRF ha l'Uffizi chantunal per industria, mastergn e lavur KIGA confermà, ch'els hajan gì diversas dumondas davart il tema «perdita da clientella pervi da l'aura».

La staziun mesauna Höhenweg da la funiculara Parsenn sur Tavau.
Legenda: La naiv manca era en la vischinanza da la staziun mesauna Höhenweg da la funiculara Parsenn sur Tavau. Keystone

Pervi da la mancanza da naiv teman blers manaschis apparentamain ch'i dettia massivas perditas da svieuta. Lavur curta pudess gidar da cumpensar ina part da las perditas. Fin uss ha il KIGA survegnì var in tozzel dumondas, quai saja cleramain dapli ch’ils dus davos onns.

Per survegnir sustegn sto il manaschi dentant cumprovar, ch'el ha gì in donn massiv pervi da la mancanza da naiv. E cumpensada na vegn betg il minus da la svieuta, mabain il temp cura ch’ins na po betg lavurar. I sa tracta dal medem princip sco tar l’indemnisaziun da mal’aura en la branscha da bajegiar. E l’indemnisaziun, 80% da las pajas dals emploiads, paja l’Assicuranza da dischoccupaziun.

RR Novitads 08:00