Tenor la Fundaziun svizra per la protecziun da la cuntrada gidass il Grischun uschia en emprima lingia al Vallais per che quel possia legalisar las bleras transfurmaziuns illegalas.
Cun nizzegiar enturn bajetgs ordaifer la zona da construcziun dettia la paradoxia ch'ils centers dals vitgs e lieus daventan bandunads entant ch'i dat ordaifer il vitg adina dapli chasas.
Cun 86:24 decisiun clera dal Cussegl grond
Il Cussegl grond aveva sustegnì cleramain la moziun da deputà Reto Crameri (PCD) cun 86 a 24 vusch. Cun in’iniziativa dal chantun duai il parlament a Berna midar la lescha federala. La finamira è d’evitar che chamonas e stallas veglias, che n’èn betg en la zona da bajegiar, giajan en decadenza.
Iniziativas dal chantun na datti dentant betg savens, almain betg ord il Grischun: Ils ultims 20 onns haja dà be 6 talas iniziativas chantunalas, ha confermà la chanzlia federala sin dumonda dad RTR.
Ils proxims pass
La regenza grischuna sto ussa elavurar l’iniziativa dals chantuns ed inoltrar quella a Berna. Sco emprim discuteschan las cumissiuns correspundentas l’iniziativa dals chantuns e fan lura ina proposta al cussegl naziunal ed al cussegl dals chantuns.
Regenza aveva refusà la moziun
La regenza grischuna aveva gia prendì posiziun: ella refusa la pretaisa. Tenor la regenza pudessan 20’000 anteriuras stallas uschia vegnir transfurmadas en abitaziuns.
Cunquai vegniss mess en dumonda la separaziun da territori da construcziun e territori da betg construcziun, uschia l'argumentaziun da la regenza.
Accellerar e simplifitgar lubientschas da bajegair
En in’ulteriura incumbensa ha Reto Crameri pretendì che las proceduras per survegnir lubientschas da bajegiar vegnian pli simplas e pli spertas. Quai fiss pussaivel enten:
- scursanir il temp da recurs
- sclerir tgi che dastga insumma far recurs
- lubir dapli projects da bajegiar senza lubientscha
- simplifitgar ils documents ch’èn d’inoltrar
- sclerir ina procedura electronica per las lubientschas da bajegiar
Il cussegl grond ha acceptà la moziun cun 91 cunter 15 vuschs. Gia ordavant aveva la regenza declerà ch’ella saja pronta d’acceptar questas propostas e d’integrar ellas en la revisiun da la lescha davart la planisaziun dal territori. Quella vegn il cussegl grond probabel a discutar l’atun 2017.
RR novitads 12:00