Siglir tar il cuntegn
Inhalt

Chantun Las elecziuns en fasa fitg decisiva

I va anc 8 mais fin a las elecziuns dal Cussegl naziunal. Ed era sch’il suveran ha il davos pled e decida la finala, tgi che po ir a Berna èn las elecziuns da quest atun en ina fasa fitg decisiva.

Josias Gasser (PVL), Heinz Brand (PPS), Silva Semadeni (PS), Hansjörg Hassler (PBD) e Martin Candinas (PCD)
Legenda: Josias Gasser (PVL), Heinz Brand (PPS), Silva Semadeni (PS), Hansjörg Hassler (PBD) e Martin Candinas (PCD) han represchentà ils ultims 4 onns il Grischun en il Cussegl naziunal. RTR, J. Clopath

Las partidas politicas èn en la fasa finala da metter ensemen lur glistas.

Fin ch’ina glista è pronta per preschentar als delegads per la nominaziun datti bleras discussiuns e tensiuns entaifer las partidas.

Candidar be per far in servetsch a la partida?

Per las partidas che pon candidar cun in cusseglier naziunal en uffizi n’èsi betg il pli simpel d’emplenir lur glistas. Ils candidats ston esser pront da s’engaschar per gidar la partida e lur cusseglier en uffizi. Mintga candidat vegn a ponderar bain sch’el è propi pront da s’engaschar ed era d’investir daners.

Cumbatter per in bun plaz sin la glista

Tar las partidas che na pon betg ir en il cumbat cun in cusseglier en uffizi datti in cumbat per in bun plaz sin la glista. Tgi ha merità quest emprim plaz, tgi ha las meglras schanzas da reussir e tgi è pront d’investir quants daners? Tut dumondas che las giuntas da las partidas ston resguardar. Las elecziuns dals onns passads han dentant mussà ch’igl è era pussaivel da vegnir elegì sch’ins n’è betg il pli sisum la glista.