Las differentas prescripziuns èn malgistas

Pendicularas han pli severas perscripziuns tar lavur curta che per exempel firmas da bajegiar. Quai vul la conferenza dals chantuns alpins ussa midar.

In chanun da naiv sin la prada verda. In maletg ch’ins ha vis regularmain il december passa.

Legenda da maletgs: Chanun ma betg naiv In chanun da naiv sin la prada verda. In maletg ch’ins ha vis regularmain il december passa. Keystone

Passa 30 pendicularas, ustarias e fatschentas da sport avevan fatg valair perditas pervia da la mancanza da naiv l'entschatta da la stagiun d'enviern ed eran s'annunziadas per indemnisaziuns ord la lavur curta.

L'uffizi per industria, mastergn e lavur dal Grischun è actualmain vida controllar las dumondas. Ma probabel na dettia nagins daners per nagin, ha ditg il schef Paul Schwendener al schurnal regiunal da radio SRF.

«  Nus fissan leds sche las reglas per la lavur curta en il turissem fissan in zic pli generusas. »

Paul Schwendener
Schef uffizi per industria, mastergn e lavur dal Grischun

Pretensius memia rigurusas

Las pretensiuns per survegnir daners sajan memia rigurusas: Tranter auter na dastgi dar nagina naiv durant 10 dis ed ils manaschis turistics ston demussar ch'els fan 75% pli pauca svieuta.

Paul Schwendener vul perquai ussa discutar il problem cun auters chantuns da muntogna e tut tenor far ina proposta al cussegl federal per schluccar las pretensiuns.

Chantuns alpins tschertgan soluziuns

Fadri Ramming è secretari general da la Conferenza da las regenzas dals chantuns alpins. Era els na èn betg cuntents cun la situaziun actuala. Perquai han els incumbensa als capos d’uffizis pertutgads da sviluppar bunas propostas ch’ins po lura suttametter a la federaziun.

«  Nus duvrain propostas cun man e pes per pudair argumentar cun la federaziun. »

Fadri Ramming
secretari general da la Conferenza da las regenzas dals chantuns alpins

En autras branschas betg uschè sever

Oliver Schärli è manader dal departament martgà da lavur tar il uffizi federal d’economia SECO. Era el conferma che las prescripziuns èn memia severas per pendicularas u butias das scis.

«  Igl na fa betg segn che pendicularas han pli severas prescripziuns tar la lavur curta pervi da malaura sco per exempel firmas da bajegiar. »

Oliver Schärli
manader dal departament martgà da lavur tar il uffizi federal d’economia SECO

Perquai ha il SECO era gia il 2013 purtà la proposta da adattar quellas prescripziuns. Il parlament aveva dentant gia baud ditg da na a quella proposta. Che ils chantuns alpins provan ussa tuttina puspè da midar las prescripziuns sin via politica, chatta Oliver Schärli la dretga ed unica soluziun. Tar ina discussiun en il parlament sustegness il SECO segir al giavisch da schluccar las prescripziun per pendicularas e lieus da skis.