Avantatgs e dischavantatgs
Ina scola senza apparats tecnics, quai è cler a tut ils preschents, na po betg pli exister. Dentant han ins durant la dieta da la Lia Rumantscha e dals magisters rumantschs vis ina ni l’autra fatscha sceptica. Represchentants da la firma da software Microsoft han numnadamain sin il grond visur mussà pussibilitads e visiuns co che la scola pudess gia bainbaud vesair ora. Anzi, en in filmin ves’ins schizunt ina scola a Hünenberg che lavura gia tenor quellas visiuns. Il rectur da la Scola auta da pedagogia dal Grischun è dentant plitost sceptic.
La digitalisaziun è ina schanza era per ils magisters
Malgrà che tschertas ideas sco per exempel dad integrar il gieu da fabricaziun Minecraft pareva a tscherts magisters fitg abstract è la gronda part persvada ch’ins stoppia far il pass digital. Dentant han era blers intunà che mintga magister stoppia chattar sia atgna via cun ils agens sistems. Vitiers duai era en futur il contact persunal tranter magister e scolar avair ina rolla impurtanta.