Siglir tar il cuntegn
cuntegn

Chantun Lai vul center da sport er senza daners da Berna

La regenza grischuna sto evaluar variantas per tuttina realisar in center da sport da naiv a Lai – era senza sustegn da la Confederaziun. Il Cussegl grond ha acceptà unanimamain in'incumbensa da la fracziun socialdemocratica.

Il maletg mussa ina rotscha da skis.
Legenda: Datti tuttina in center da sport da naiv a Lai? Keystone

In center a Lai fissi impurtant per promover il sport en general, e surtut tar uffants e giuvenils. Plinavant avessi quel era ina muntada turistica ed economica, ha la PS argumentà.

La regenza grischuna è pronta d'evaluar suandantas variantas per la realisaziun:

  • be tras il chantun Grischun
  • tras plirs chantuns, inclusiv il chantun Grischun
  • tras il chantun Grischun e las vischnancas pertutgadas
  • tras il chantun Grischun e privats

La primavaira aveva il Cussegl federal decidì da sistir la planisaziun per in center naziunal da sport da naiv a Lai, e quai enfin l’onn 2023.

RR novitads 18.00