Siglir tar il cuntegn

Header

cuntegn

Chantun La tatta na dastgava betg votar...

Dapi 20 onns è l'egualitad tranter um e dunna francada en la constituziun svizra. Ma tge ha la lescha tut purtà? Insumma, co stat quai ozendi cun l'egualitad en il Grischun ubain en Svizra? Dunnas da differentas generaziuns, politicheras ed in um che ha vivì passa in onn sco dunna raquintan.

El ha gia stuì tadlar da tuttas offensiuns e discriminaziuns pussaivlas: Christian Seidel, l'autur ed anteriur schurnalist e manager da Minca. El ha vivì in onn sco dunna. Or da Christian è daventà Christiane. E sco dunna n'è betg mo sia gardaroba sa midada, mabain er sia percepziun pertutgant egualitad. «Avant l'experiment sun jau stà in um ignorant schess jau oz. Jau hai adina pensà che dunnas sappian far il medem sco ils umens, dentant entras l'esser dunna hai jau pir vesì che quai n'è betg uschia.»

audio
Mezdi: 20 onns lescha d'egualitad - Christian Seidel raquinta
ord Actualitad dals 01.07.2016.
laschar ir. Durada: 3 minutas 46 Secundas.

El haja stuì tadlar brutalas offensiuns ed è er vegnì attatgà. Cul temp haja el simplamain stuì restrenscher ses radius. Sch'el veseva pia ch'in um haja gì il spruh gia sin il lef, ha el simplamain midà la vart da la via. Dentant er las bellas varts da l'esser dunna ha Christian pudì giudair sco Christiane. El saja sesentì in zic sco en in pajais da la cucagna – cunzunt perquai ch'el haja pudì mussar dapli sentiments che sco um. Per dapli egualitad en la societad fiss tenor l'autur da cussegliar a mintga uman da midar per in mument la rolla.

Tge far sche la lescha d'egualitad na vegn betg respectada?

Ins ha la medema qualificaziun sco il collega da lavur masculin, fadia dentant 700 francs pli pauc per mais. Tge far? Peter Portmann è il president dal post da mediaziun per dumondas d'egualitad da schanzas. Pia da quai post che vegn sco emprim en acziun tar dumondas da discriminaziun. En il Grischun vegnan dentant mo fitg paucs cas avant l'autoritad.

audio
Mezdi: 20 onns lescha d'egualitad - tge far sch'insatgi cuntrafa
ord Actualitad dals 01.07.2016.
laschar ir. Durada: 3 minutas 34 Secundas.

Peter Portmann crai, perquai che las persunas hajan er in zic tema d'accusar l'agen schef. Ubain perquai che blers na san betg ch'i dat l'autoritad da mediaziun. En general er sch'el guarda sin auters chantuns, saja dentant creschì il dumber da cas ils ultims onns, uschia che las persunas sajan bain vegnidas pli curaschusas d'accusar malgistadads discriminantas.

Tge ha la lescha d'egualitad purtà?

La lescha per l'egualitad tranter um e dunna ch'e dapi 20 onns en vigur è bain realisada sin il palpiri, dentant betg dapertut en la vita quotidiana. Politicras dal Grischun san era, nua ch'il basegn per dapli egualitad è anc il pli grond: tar las pajas e tar la cumpatibilita da famiglia e carriera.

audio
Mezdi: 20 onns lescha d'egualitad - tge ha la lescha purtà?
ord Actualitad dals 01.07.2016.
laschar ir. Durada: 2 minutas 38 Secundas.

Uschè ditg sco las dunnas hajan da purtar duas e trais chargias sco professiun, famiglia e forsa anc ina u l'autra lavur publica, dovria quai meglras structuras ed er bler engaschament dals umens. Per nagut saja la lescha dentant insumma betg stada. Ina lescha dovria simplamain ses temp per propi ir en vigur. Brigitta Gadient, anteriura cussegliera naziunala, sa regorda anc da la lescha da l'assicuranza da maternitad che gia ses tat e ses bab hajan cumbattì persuenter, e pir ella haja lura propi decidì sur da quella lescha.

audio
Mezdi: 20 onns lescha d'egualitad-discussiun tranter generaziuns
ord Actualitad dals 01.07.2016.
laschar ir. Durada: 15 minutas 7 Secundas.

L'egualitad ord la vista da las generaziuns

Oz èn las portas per dunnas giuvnas pli avertas ch'anc avant 20 onns. Ellas na ston betg pli cumbatter tant ed er betg s'occupar tant cun attatgas chauvinisticas per exempel cu ellas s'annunzian per ina plazza ch'era ina giada prevesida cunzunt per umens.

Dunnas giuvnas èn activas, segiras e libras. Er libras da sexissem? Oceana Galmarini (23) e Maria Cadruvi (67), omiduas schurnalistas, raquintan lur opiniuns tar il tema. Tgi è per exempel per ina quota da dunnas e tgi avess fadia da esser la dunna per la quota. Tgi è da l'avis che feministas èn memia radicalas, tgi di ch'i dovri la radicalitad per cuntanscher insatge. Cler è dentant, bler saja vegnì pli empernaivel per dunnas, dentant saja anc bler da far.

RR actualitad 11:00

Artitgels legids il pli savens