Siglir tar il cuntegn
cuntegn

Chantun La Svizra sua – els suan il pli fitg

Temperaturas da passa 30 grads: la Svizra sua. Segiramain tutgan ils tetgers tar quels che pateschan il fitg da las autas temperaturas actualas. Ma l’entira branscha da construcziun sto il mument suar, ma sulet pervia da las temperaturas.

Legenda: Guardar il video Dis da chalira, tge far?. Durada 02:20 minutas.
Or da Telesguard dals 23.06.2017.

Els construeschan nossas vias, lavuran sin palancas sin nossas chasas e trottan per noss tetgs enturn, e quai en la pli gronda chalira. Era ils dus frars Rafael e Joel Bisquolm cumbattan cunter l’unda da chalira actuala, e quai sin tetg.

«Jau sun pli gugent sin tetg ch’en in biro»

Ils passa 40 grads gist sur il tetg da plattas èn franc motiv avunda per suar. Tuttina, Joel Bisquolm na midass per quai betg sia clamada: «Jau sun pli gugent sin in tetg, ora el vent ni ora ella natira ch'insumma en in biro.» Ses frar Rafael manegia: «Nus essan disads vida quai, quai fa part da nossa clamada.»

Tge pon lavurants far cunter la chalira?

Era sch’ils dus frars Bisquolm lavuran savens senza t-shirt, na midia la vestgadira tenor Joel Bisquolm betg la massa. Sche quai saja chaud saja quai chaud, qua gidia gnanc da sa trair ora. Meglier saja baiver bler, il pli gugent aua fraida cun glatsch, ha accentuà Joel Bisquolm. E mintgatant vegnia era la dunna cun in glatsch per mangiar. Gist tals gests fetschian la differenza. Ed insumma, manegia Rafael Bisquolm, il meglier gidia da restar cools el chau e surtut positivs. La finala saja chalira anc adina meglier che plievgia.

RR Telesguard 17:40