Siglir tar il cuntegn

Header

audio
Bunura: Las reacziuns sin ils projects da votaziun communals
Or da Actualitad dals 29.02.2016.
laschar ir. Durada: 4 minutas 38 Secundas.
cuntegn

Chantun La survista locala

9 giadas gea a las propostas da las autoritads: questa dumengia ha il suveran mussà en tut las votaziuns ed en l’elecziun a Landquart fiduzia en sias autoritads communalas.

Survista da las votaziuns communalas

  • vopna da domat
    Legenda: Domat. RTR

    Domat ha acceptà ...

    ... cun 2'443 gea cunter 361 na cleramain per far da l’areal da l’anteriura resgia gronda Vial-Tuleu ina zona d’industria. A la votaziun èn sa participads radund 58% da las votantas e dals votants. Plinavant han ils da Domat ditg gea ad ina reutilisaziun dal local da pumpiers Tircal. E la cuschina da la scola da fin qua vegn da nov nizzegiada sco localitads per l'instrucziun.

  • Il resultad da Cuira
    Legenda: Il resultad da Cuira. RTR

    La Lumnezia ha acceptà ...

    ... cun 671 (75,64%) gea encunter 198 na da reducir il dumber da persunas en la suprastanza communala da 9 sin 5. Questa reducziun da la suprastanza pretenda ina midada da la constituziun da la vischnanca - ina midada che sto anc vegnir approvada dal chantun. ... cun 666 gea (80,53%) encunter 123 na per ina petiziun pertutgant il manaschi da scola a Vrin/Lumbrein. ... cun 770 gea (89,95%) encunter 59 na cleramain per ina nova lescha da sepultura. ... cun 710 gea (86,16%) cunter 81 na cleramain per ina nova lescha d’ustaria.

  • la vopna da Cuira.
    Legenda: Cuira RTR

    Cuira ha refusà...

    ... l'iniziativa «Per dapli spazi da viver pajabel» cun in resultat stretg da 6'678 na encunter 6'592 gie ed uschia cun 86 vuschs differenza. Era la cuntraproposta dal parlament da la citad è vegnida refusada. Totalmain han 57,22% da las votantas e dals votants inoltrà lur vusch.

  • Il resultad da la Val Müstair.
    Legenda: Il resultad da la Val Müstair. RTR

    La Val Müstair ha acceptà ..

    ... cun 515 gea encunter 104 na cleramain, che la suprastanza communala vegn elegida en avegnir sur tut la Val Müstair. Quai vul dir ch’i na dat betg pli elecziuns en las singulas fracziuns. Il president communal Arno Lamprecht è fitg cuntent cun il resultat fitg cler. Uschia po la Val Müstair eleger tenor il nov sistem sia suprastanza communala l’emprima giada quest atun.

  • La vopna da Scuol
    Legenda: Scuol RTR

    Scuol ha acceptà ...

    ... cun passa 80% gea ils 4 projects da votaziun per la nova regiun Engiadina Bassa / Val Müstair: Scuol ha approvà cun 1’153 gea a 192 na cleramain la cunvegna davart la scola da musica e chant, cun 1’176 gea a 158 na cleramain la rimnada da rument da chasa, cun 1’034 gea a 254 na cleramain la cunvegna davart la gestiun per il post regiunal d'integraziun e cun 1’000 gea a 249 na il management regiunal per ils proxims 4 onns.

  • La vopna da Flem
    Legenda: Flem RTR

    Flem ha acceptà ...

    ... da cumprar pliras parcellas terren entras la vischnanca per in total da bunamain 5 milliuns francs: cun 668 gea encunter 488 na è il suveran per il contract cun la societad simpla “Fragliuns Kuhn” e cun 718 gea encunter 444 na per ils contracts cun Rolf Bodenmann, resp. La Boliga SA. Las parcellas acquistadas duajan vegnir nizzegiadas sco parcellas da bajegiar per indigens e per pussibilitar il svilup da la scola a lunga vista.

  • sepp föhn
    Legenda: rtr

    Landquart ha reelegì ...

    ... cun 2’088 vuschs tar in pli absolut da 1’126 vuschs a Sepp Föhn da la PCD. Uschia resta el enfin al 2020 a la testa da Landquart. Föhn n’aveva betg cuntracandidats. La participaziun a l’elecziun è stada tar 48%. 558 cedels da votar èn stads vids u betg valaivels.

  • La vopna da Tavau
    Legenda: Tavau RTR

    Tavau ha acceptà ...

    ... cun 3’339 gea (85,92%) a 547 na (14,08%) cleramain in nov center da passlung ed ina nova scolina. Tavau vegn a spizzar e construir in nov center da passlung e la nova scolina Herti. La nova construcziun duess custar en tut bun 3,85 milliuns francs.

  • la vopna dad Arosa
    Legenda: Arosa RTR

    Arosa ha acceptà ...

    ... cun 689 gea (58,4%) a 491 na (41,6%) da reveder parzialmain la planisaziun locala per la chasa da tgira Surlej. Uschia vegn l'anteriura chasa da tgira Surlej en la zona dal vitg. Quai lubescha a la Fundaziun Surlej da pudair vender pli char il bajetg. Il retgav va en favur dal nov center d'attempads ch'è vegnì avert l'atun 2014.

Artitgels legids il pli savens