Siglir tar il cuntegn

Chantun La situaziun en il Grischun è sa normalisada

La situaziun sin las vias en il Grischun è per gronda part sa normalisada ed er ils trens da la Viafier retica curseschan puspè. Il privel da lavinas è da nov en l'entir Grischun anc considerabel, pia stgalim 3.

La carta Svizra cun las zonas da lavinas. Per l'inter Grischun ed il Vallais vala uss stgalim 3.
Legenda: Tenor l'institut da naiv e lavinas a Tavau vala per l'entir Grischun in privel considerabel da lavinas. Screenshot

La notg sin mesemna n'hai betg pli pluvì e navì en il Grischun. Perquai è la situaziun sin las vias en il Grischun per gronda part sa normalisada.

La situaziun sin las vias

  • En il Partenz èn Valzeina e S. Antönia cuntanschibels.
    • La fracziun Ascharina è puspè cuntanschibla.
    • Serrada resta anc la via da S. Antönia ad Aschüel.
  • Samignun è entant puspè cuntanschibel sur l'Austria. La via tranter Martina ed Acla da Fans resta però anc serrada.
  • La via da Martina fin tar il cunfin cun l'Austria resta anc serrada.
  • La Val Müstair è sulet accessibla via il Tirol dal Sid. ll chantun vul valitar la situaziun dal pass dal Fuorn proxim venderdi a las nov.
  • Er la via tranter Malögia e Segl è dapi mardi a las 19:00 averta.
  • Serrada è anc la via dal Lucmagn.
  • La via da Sumvitg a Mustér è averta a dapi mardi las 07:00.
  • La via da Versomi en Stussavgia è puspè averta.
  • Plinavant èn diversas vias localas vinavant serradas pervia dal privel da lavinas. Survista en detagl., il link avra en ina nova fanestra

L'Institut da naiv e lavinas a Tavau annunzia in privel da lavinas considerabel per l'entir Grischun. Quai munta che lavinas pon ir giu surtut da spundas stippas ch'èn inditgadas en il bulletin da lavinas. Er lavinas spontanas èn anc pussaivlas.

Legende: Video La lavur da la cumissiun da lavinas – Co decider cura serrar ina via? abspielen. Laufzeit 3:56 Minuten.
Or da Telesguard dals 22.01.2018.

Viafier retica ha pudì avrir las lingias

La Viafier retica ha pudì avrir mardi en damaun pliras lingias ch'èn stadas interruttas. Actualmain èn tut las lingias da tren da la Viafier retica puspè avertas.

  • Trens tranter Glion e Mustér van dapi mardi a las 12:00 puspè.
  • Dapi mardi a las 14.30 è il traject tranter Scuol e Cinuos-chel puspè avert.

Situaziun precara da glindesdi è passada

Las navaglias da glindesdi han bloccà pliras vischnancas en il Grischun. Adina dapli naiv e la situaziun da lavinas fitg precara han sfurzà da serrar diversas vias e colliaziuns en il Grischun. Pertutgadas eran oravant tut la Surselva, il Partenz, Tavau, l'Engiadina Bassa, la Val Müstair ed il Samignun.

Zermatt è puspè cuntanschibel sin rodas

A partir da mesemna saira a las tschintg circuleschan puspè trens sin il traject tranter Zermatt e Täsch. Tranter Visp e Täsch circuleschan però vinavant bus da remplazzament. Quai pervi da crudada da crappa. Il traject resta serrà almain enfin damaun da mezdi. Quai ha communitgà la Viafier Matterhorn-Gottard.

Er en ils chantuns Berna e Soloturn è il traffic da trens per part anc adina impedì.

La situaziun d'aua gronda vegn pli ruassaivla

La situaziun tendida d'aua gronda en Svizra lascha plaunsieu suenter. En il decurs dal di duain ils livels da flums ed auals puspè ir enavos, scriva SRF Meteo. Ils davos dis avevan la blera naiv e la ferma plievgia laschà crescher las auas en bleras regiuns da la Svizra. Cun resguardar l'entir schaner discurra SRF Meteo gia da novs records da plievgia e naiv uschia a Tavau ed en plirs lieus en il Vallais.

RR novitads 06:00