Siglir tar il cuntegn

Chantun La romantica en ina mar da chandailas

Gia per l’otgavla giada ha il Festival cultural Origen emplenì las hallas da la Viafier retica a Landquart per trais concerts da tempra da Nadal. Quest onn ha Radiotelevisiun Svizra Rumantscha filmà ils concerts en plaina lunghezza.

Legende: Video Entir concert «Chant da la Romantica» dal «Ensemble Vocal Origen», direcziun: Clau Scherrer abspielen. Laufzeit 61:00 Minuten.
Or da RTR dals 20.12.2015.

Sut la direcziun da Clau Scherrer ha l’Ensemble vocal Origen pudì intgantar danovamain in grond public en trais concerts da la fin d’emna dals 18-20 da december 2015. Als trais concerts èn stads preschents a Landquart totalmain var 2400 auditurs ed audituras. Per l’inscenaziun ha segnà responsabel puspè l’intendant Giovanni Netzer.

La romantica en in mar da chandailas

Quest onn ha Giovanni Netzer procurà per in’inscenaziun da glisch che ha fatg l’artg da la stgiraglia e fradaglia dal temp d’Advent enfin tar la glisch da speranza da Nadal. In grond portal amez la halla ha dà reflexiun a las diversas atmosferas da glisch. En ina mar da var 1000 chandailas – in element d’inscenaziun bunamain tradiziunal a Landquart – ha l’ensemble chantà ovras da trais cumponists da la romantica: Johannes Brahms, Josef Gabriel Rheinberger e Felix Mendelssohn Bartholdy.

Legende: Video Origen envida al concert da Nadal a Landquart abspielen. Laufzeit 3:19 Minuten.
Or da Telesguard dals 18.12.2015.

Ina sfida logistica per la Viafier retica

Per la Viafier retica èn ils concerts mintg’onn ina sfida logistica. Gia durant l’entir’emna èn vegnidas rumidas e preparadas las immensas hallas da lavur: locomotivas e vaguns da tren han stuì bandunar ils lavuratoris per far plazza a l’entira infrastructura e culissa dad Origen. Malgrà ils sforzs supplementars avant ils dis da festa, ha la Viafier retica collavurà ussa gia per l’otgavla giada cun il Festival cultural Origen.

Ina premiera era per RTR

En occasiun dal 10avel onn d’existenza dal Festival Cultural Origen ha RTR prendì la chaschun per filmar quest onn ils concerts da Nadal dad Origen.
Parts dal concert èn era d’udir sur Nadal al Radio Rumantsch, numnadamain ils 24 da december a las 18.15-20.00 ed ils 25 da december a las 09.00-11.00.