Siglir tar il cuntegn

Chantun La Repower perda 136 milliuns francs

L’interpresa d’energia grischuna Repower ha serrà ses quint annual 2015 cun ina sperdita da 136 milliuns francs. En tut ha la Repower nudà ina svieuta da 1,9 milliardas francs, quai in minus da 17%. Sco l’interpresa scriva saja ella sin buna via da realisar las strategias novas.

Grafica.
Legenda: RTR

La sparta d’energia ha da sbatter cun plirs problems. In da quest problems èn ils bass pretschs per energia e sco la Repower scriva quintia ella che quest trend cuntinueschia er ils onns proxims. Il segund punct da quitads per la Repower è il ferm franc svizzer che haja smatgà massiv sin ils resultats dal 2015. La producziun da energia idraulica è sur la media dals ultims 10 onns dentant na po quest energia betg vegnir vendita per in pretsch rentabel, scriva Repower.

Aczias dal chantun Grischun perdan valita

Legenda:
Valitaziun aczias Repower SA Administraziun da finanzas GR

Las venditas restan constantas

En tut ha l’interpresa vendì current electric per radund 17,7 uras terawatt, quai saja restà constant en cumparegliaziun cun l’onn avant. Tar ils clients noda l’interpresa in pitschen augment da 6%. Per rinforzar l'interpresa propona il cussegl d'aministraziun a la radunanza generala dals 12 da matg da desister d'ina dividenda.
Plinavant vegn il cussegl d'administraziun da la Repower reducì da 12 sin 8 commembers.

Nagina collavuraziun pli stretga tranter Repower e Swisspower

Las duas interpresas d’electricitad Repower e Swisspower Energy SA na vulan uss tuttina betg collavurar pli stretg. Quai han las duas interpresas communitgà. Il december passà avevan Repower e Swisspower communitgà da vulair examinar ina pli vasta collavuraziun. Dapi lur hajan ins gì discurs ed ins saja vegnì a la conclusiun da desister da questa collavuraziun. Las sinergias spetgadas èn vegnidas taxadas da domaduas varts so memia pitschnas. Repower e Swisspower veglian dentant collavurar vinavant sco partenaris.

RR novitads 07:00