La regenza grischuna n'accepta betg la decisiun da l'ETH

La direcziun da la Scola politecnica federala da Turitg duai reponderar sia decisiun da stritgar il sustegn finanzial per la professura dal rumantsch a l'universitad da Turitg.

La Scola politecnica federala a Turitg

Legenda da maletgs: L'ETH duai reponderar sia decisiun da betg pli sustegnair la professura rumantscha a l'uni Turitg. Reuters

Sco la regenza grischuna scriva, na possia ella betg acceptar la decisiun da stritgar il sustegn annual da 100'000 francs. Quests daners sajan impurtants per il rom «rumantsch» a l'universitad Turitg. La decisiun da l'ETH flaivlentia las stentas grischunas per promover il rumantsch.

Pertutgadas sajan la furmaziun da scolastas e scolasts per il stgalim superiur e per las scolas medias, sco era la furmaziun da persunas per l'administraziun publica e per las medias.

Er la Cussegliera naziunala, Silva Semadeni ed il Cusseglier naziunal Martin Candinas n'èn betg cuntents. Els han inoltrà dumondas al Cussegl federal. Quellas vegnan rispundidas durant l'ura da dumondas. Tranter auter vai per la legalitad da questa decisiun.

RR novitads 10:00