«La Quotidiana» cumpara definitivamain er il 2018

L’ediziun da la Quotidiana fa part dal project «Medias rumantschas 2019». Per quest project ha la Lia Rumantscha (LR) pudì rimnar ils daners necessaris da la Confederaziun, dal Chantun, da l’Agentura da Novitads Rumantscha (ANR) ed ina cumpart vegn era da la Lia Rumantscha (LR).

Il project «medias rumantschas 2019» cumenza il prim da settember. La direcziun vegn la Lia Rumantscha ad avair, scriva ella a las medias. L’ediziun da la gasetta fa part dal project ed è uschia garantida per il 2018. La Confederaziun, il Chantun, la ANR e la LR vegnan a participar cun ina cumpart cuminaivla da 200’000 francs. Ils custs per l’ediziun che restan vegn la Somedia SA a surpigliar, scriva la Lia Rumantscha.

La finanziaziun dal project «Medias rumantschas 2019»

Per realisar il project vegn la Confederaziun communablamain cun il chantun Grischun, la LR e l’ANR a dar 200’000 francs e quai en parts egualas. Ina part dal project è d’elavurar in concept per ina purschida da medias futura en lingua rumantscha ch’includa tut las medias rumantschas e resguarda sper ils formats tradiziunals era ils formats digitals.

Retschertga represchentativa

Per propi chattar ils basegns da tuts duai uss vegnir elavurada a moda professiunala ina retschertga tar las consumentas ed ils consuments. Il project duai esser sin maisa l’atun 2018. Fin alura sto anc la radunanza dals delegads da la LR dar ses consentiment en chaussa. Las decisiuns duajan alura furmar il mussavia per las propostas concepziunalas dal project «Medias rumantschas 2019», scriva la Lia Rumantscha.

Regenza grischuna dat 50’000 francs

Tenor ina communicaziun da la regenza grischuna vegn ella a sustegnair il project «Medias rumantschas 2019» cun ina cumpart da 50’000 francs. Cun quai veglian la Confederaziun, il chantun Grischun, ma era la Lia Rumantscha promover la lingua rumantscha cun in sustegn da las medias rumantschas.


Ord l'archiv:

RR novitads 10:00+