Siglir tar il cuntegn
cuntegn

Chantun La PSR vul ina gasetta rumantscha gratuita

La Pro Svizra Rumantscha PSR – l'uniun ch'è vegnida fundada avant 25 onns cun la finamira da stgaffir ina gasetta quotidiana rumantscha – propona ch'ina nova gasetta surregiunala rumantscha saja en mauns publics.

Purtret dal logo da la Pro Svizra rumantscha.
Legenda: La Pro Svizra Rumantscha vul ina nova gasetta surregiunala. MAD

Quai munta ch'i stoppia vegnir fundà in nov organ ch'edescha ina gasetta rumantscha. Quel duess manar ina redacziun che producescha agens cuntegns. Quests cuntegns duain vegnir preschentads er en furma online, e sche pussibel a furma multimediala, pia cun videos ed audios. Sco la PSR communitgescha saja questa proposta dad els stada bainvesida a la maisa radunda da venderdi.

La PSR vul plinavant ina furma per ina gasetta gratuita che po vegnir distribuida en las vischnancas rumantschas u bilinguas, en furma da palpiri ed era online. I duai era dar boxas cun la gasetta en las citads grondas da la Bassa. La gasetta possia dentant er vinavant vegnir abunada.

La Lia Rumantscha surpiglia uss il timun. La maisa radunda saja stada productiva uschia che la Lia vul empruvar da resguardar las ideas da quella.

Plinavant propona la PSR il suandant proceder sut il timun da la Lia Rumantscha:

  • Ella duai pretender cifras detagliadas da la Somedia l'editura da La Quotidiana.
  • La Lia tschertga (cun ils preschents a la maisa radunda) in manader u ina manadra da project d'ina nova gasetta.
  • La persuna duai lura en in emprim pass far in'enquista davart il basegn ch'ils rumantschs e las rumantschas han per ina gasetta rumantscha, per eruir il format.
  • En in segund pass duai la persuna preparar la realisaziun da questa gasetta.
  • La Lia duai tschertgar ina soluziun cun il chantun, l'ANR e la Somedia.

Ord l'archiv:

RR novitads 06:00