En l'ospital chantunal a Cuira è oravant tut la partiziun da la medischina d’uffants stada pli che plaina ils davos dis.
Sumegliant èsi era stà en il ospital da l’Engiadin’Ota. Sco la secretaria da la direcziun, Stephanie Balmer ha confermà ad RTR, haja dà ils davos dis massiv dapli uffants malsauns en l'ospital. I saja in augment extraordinari e betg spetgà uschia.
L'ospital a Tusaun è medemamain stà plain sur la midada da l’onn, quai ha il directur Reto Keller confirmà al telefon. I sajan oravant tut stads pazients cun grippa ed accidents da sport.
Savens puntga u malsognas dal flad a Glion e Savognin
Era l'ospital regiunal Surselva a Glion è occupà fitg. Tenor il schefmedi da la medischina interna, Ueli Zellweger, haja quest onn marcantamain dapli pazients cun malsognas respiratoricas, sco p. ex. malcostas (puntga).
Quai constatescha er l'ospital da Savognin. Tenor il directur Gion Cola saja l'occupaziun dals letgs dentant stada ils davos dis tuttina sco l’onn passà.
Era en l’ospital a Poschiavo procura la grippa e sias consequenzas per letgs plains. Sco il manader da l'administraziun da pazients, Giustino Crameri, ha confermà, sajan 20% dals pazients en l’ospital pervia da la grippa. Quai na saja dentant betg extraordinari.
Judith Fasser, la directura da l’ospital da la Val Müstair ha ditg che la partiziun acuta saja occupada il mument dubel uschè fitg sco usità. Quai muntia, ch'igl haja actualmain 7 pazients sin questa partiziun. Ils cas da grippa sajan lura vegnids pir ils davos dis, ma tut ils pazients cun grippa hajan problems cun il lom u las bronchias. Dentant na sajan ils cas actuals betg extraordinaris per l’ospital da la Val Müstair.
Tavau ha strusch grippas
Cun nagins cas da grippa è l’ospital a Tavau confruntà il mument. Tenor il directur, Hans-Peter Wyss, saja l’ospital occupà per 90%, dentant n'ha la grippa anc betg cuntanschì ils da Tavau. Quai possia dentant sa midar entaifer paucs dis.
RR actualitad 12:00