Siglir tar il cuntegn
cuntegn

Chantun La Capauliana – nov schlantsch cun Felicia Montalta

La dispita era gronda en la Fundaziun Capauliana avant che Mierta Capaul, la presidenta e figlia dal fundatur Duri Capaul, era extrada dal cussegl fundaziun il matg. Ussa è il cussegl da fundaziun puspè cumplet cun Felica Montalta. Ella duai purtar novs impuls en la fundaziun.

Felicia Montalta, la nova commembra dil cussegl da fundaziun
Legenda: Felicia Montalta, la nova commembra dal cussegl da fundaziun da la Capauliana. MAD

Professiunalmain ha Felicia Montalta, la nova commembra dal cussegl da fundaziun, da far nagut cun art. La dunna da marketing, ch’è sia atgna patruna, è dapi il 2009 numnadamain spezialisada sin il svilup dal turissem en il Grischun – cunzunt en regiuns periferas.

Profitar da sia vasta experientscha da sviluppar, manar e finanziar projects, duai ussa dentant era la Fundaziun Capauliana, cunzunt la manadra da fatschenta: «L’idea è propi, ch’jau saja in zic la partenaria da sparring da Chantal Störmer», precisescha Montalta. «Ella duai uschia avair in contact direct cun il cussegl da fundaziun e pudair er sviluppar ensemen cun el ideas e projects.» Quai che na saja betg stà il cas fin ussa.

Resonanza sur il chantun ora

Ch'ils projects da Felicia Montalta han ina buna resonanza e ch’els han gia procurà per attenziun sur ils cunfins grischuns ora, ha la dunna da 45 onns per exempel gia mussà cun il project da l’emprim runal da skis solar a Tenna en Val Stussavgia avant in pèr onns. In project nua ch'ella era s'occupada er da la finanziaziun. Il tema finanziaziun vegn er a fatschentar ella tar la Fundaziun Capauliana.

Betg en ina situaziun finanziala precara

Nua exactamain ch'ella ed il cussegl da fundaziun vulan ir per ils daners, sch'igl è dal maun public, da privats u da l'economia, è dentant anc avert, respectivamain anc en lavur.

«Sut squitsch finanzial n'è la fundaziun dentant insumma betg», di Felicia Montalta. «I va dentant er da procurar, ch’i dat la fundaziun era a lunga vista – pia era ils proxims 30 onns.»

Esser preschenta en la populaziun

Impurtant saja che la fundaziun Capauliana fetschia vinavant bunas acziuns per mussar la collecziun da passa 25'000 ovras a la publicitad, di la spezialista da PR e marketing, sco fatg per exempel cun il nov cudesch da Charly Bieler che cuntegna maletgs da la fundaziun.

Bler na possia ella dentant betg dir co ch'i duai ir vinavant cun la Fundaziun Capauliana: «Igl è, sch'ins vul dir uschia, in restart suenter che la presidenta Mierta Capaul è extrada.»

Augmentar la savida en il cussegl da fundaziun

Sper segirar la finanziaziun e sustegnair pli fitg la manadra da fatschenta Chantal Störmer cun sviluppar ideas e projects, veglia il cussegl da fundaziun proximamain er augmentar il dumber dal cussegl da trais sin tschintg ed uschia er sviluppar la savida en la fundaziun.

RR actualitad 12:00