Siglir tar il cuntegn

Chantun L'ospital chantunal Cuira vegn undrà cun «Spitalrose»

Il premi Spitalrose undreschia las schliaziuns innovativas da l'ospital ch'el ha fatg per promover l'attractivitad sco patrun da lavur regiunal.

Legende: Video Rosa dal spital a Cuira abspielen. Laufzeit 00:55 Minuten.
Or da RTR dals 04.07.2017.

Cun set mesiras augmenta l'ospital chantunal dal Grischun sia attractivitad sco patrun. Per questa prestaziun surdat l'associaziun da medis ad el il premi da la «Spitalrose 2016». Il premi undrescha las prestaziuns progressivas da l'ospital en il sustegn da scolaziun e carriera dal persunal e sur tut per il sustegn da collavuraturs che han famiglia. L'ospital promova er che collavuraturs san lavurar parzialmain sco era il return en il mastergn per exempel suenter ina pausa da famiglia.

Cun onurar la prestaziun da l'ospital chantunal dal Grischun vul l'associaziun da medis ch'era auters ospitals suondian l'exempel da l'ospital chantunal Grischun. Quel vul numnadamain valair sco patrun attractiv.

Las set mesiras che l'ospital chantunal ha piglià a mauns

1.
Planisaziun da la carriera structurada sin tut ils plauns hierarchics independentamain dal pensum da lavur.
2.
Lavur parziala daventa pussaivel en tut ils departaments. Vesibel duai quai gia esser en la descripziun da las plazzas ch'i vegn sustegnì. I vegn realisà models da lavurar ch'èn cumpatibels cun famiglia en rama da las pussaivladads localas.
3.
Il return en il mastergn da collavuraturas suenter maternitad ha ina prioritad fitg auta e vegn promovì fitg ferm. Il plan da carriera ed il return vegnan planisads gia avant il congedi da maternitad a moda concreta.
4.
Scolaziuns independentas da temp e lieu stattan a disposiziun a tut ils collavuraturs a moda electronica.
5.
L'ospital metta a disposiziun e gida da chattar a tut ils collavuraturs canortas per che lur uffants possian vegnir tgirads.
6.
Persunas cun uffants pitschens vegnan favurisads tar il reglament da parcadis per levgiar a quels la tgira dals uffants.
7.
L'ospital chantunal sustegna geniturs cun in congedi da maternitad e paternitad pli aut che perscrit. Per mammas surpiglia l'ospital chantunal 90% dals custs da paja (perscrit èn 80%) durant il congedi da maternitad ed i pon cumenzar cun quel gia duas emnas avant il termin da la naschentscha. Per ils babs vegn il congedi da paternitad auzà da 3 dis sin 5 dis (in'emna).

Anc n'èn betg tuttas mesiras realisadas, ma tuttas èn sin buna via.

RR novitads 11:00