Siglir tar il cuntegn

Chantun L'iniziativa AVSplus è malsegira

10% dapli rentas per tuts. Quai pretenda l’iniziativa AVSplus che vegn ils 25 da settember avant l’urna. Oz han ils adversaris da quest’iniziativa preschentà lur arguments daco ch’i è da dir na a l’iniziativa.

L'iniziativa AVSplus è malsegira.
Legenda: I saja in'iniziativa che na saja simplamain betg ponderada bain, manegia Stefan Engler dal comité cunter l'iniziativa. RTR, GIAN CARLO CANDINAS

10% dapli renta tuna bain. Da quest maini è era Stefan Engler (PCD) dal comité Grischun encunter l’iniziativa. El vegn dentant tar la conclusiun ch'in gea a questa iniziativa pericliteschi il futur da la AVS.

Fin il 2018 stuessan ins numnadamain quintar cun custs supplementars da 4 milliardas francs e davent da l'onn 2030 cun custs supplementars da 5,5 milliardas francs. Gia oz na saja la finanziaziun per il futur betg segirada, di Engler.

Era ils purs na profitassan betg tar in gea

Il comité ch'è per l'iniziativa di che spezialmain il pievel Grischun stuessi votar gea. Gist il Grischun cun blers purs, che hajan mo l'AVS suenter la pensiun, profitassi da l’iniziativa.

Tenor Stefan Engler vegni dentant survesì inqual chaussa. Il davos pudessi dar dapli rentas per ils purs, dentant dessi era ina reducziun da las contribuziuns directas per ils purs.

In’augmentaziun da las prestaziuns avessi numnadamain la consequenza ch'era la Confederaziun avessi d’auzar las contribuziuns a la AVS, uschia ch’i stuess vegnir spargnà en auters lieus, per exempel tar l'agricultura.