Siglir tar il cuntegn

Header

video
L'emprima presidenta dal Cussegl grond
Or da RTR dals 22.11.2016.
laschar ir. Durada: 23 Secundas.
cuntegn

Chantun L'entschatta da las dunnas en la politica grischuna

Dunnas en la politica grischuna. Pir dapi ils onns 70anta è quai realitad. Il 1973 èn las emprimas dunnas vegnidas elegidas en il Cussegl Grond. Ils emprims pass na èn dentant betg adina stads simpels.

Ils 7 da favrer 1971 ha il suveran svizzer (ils umens) detg «gea» al dretg da vuschar ed eleger da las dunnas cun 65,7% da las vuschs. Ils 31 d’october da quai onn èn dunnas uschia stadas per l’emprima giada elegiblas per las elecziuns naziunalas. Dals 200 posts en il Cussegl naziunal han dunnas recaltgà 11. Il sigl en il cussegl dals chantuns ha da lezzas uras mo ina dunna dumagnà.

Era en il Grischun bainspert en la politica

Dus onns suenter il «gea» al dretg d'eleger per tant Svizers sco er Svizras è vegnida elegida Ida Derungs (PCD) en il Cussegl Grond dal Grischun. Ensemen cun Lisa Bener (PLD) e Elisabeth Lardelli (PPS) è ella stada l’emprima dunna che ha prendì plaz en il Cussegl Grond. Nagin aveva propi quintà cun l'elecziun da las trais dunnas, sa regurda Ida Derungs vi da quels dis. Reacziuns hai dà bleras. Tscherts hajan ditg, che las dunnas s'audian a chasa. La gronda part da las reacziuns sajan dentant propi stadas positivas, di Ida Derungs.

Tscherts han ditg che las dunnas ston star a chasa a mirar dals uffants.
Autur: Ida Derungs Emprima presidenta dal Cussegl Grond

Avant las sessiuns dal Cussegl Grond èn las trais dunnas adina s’entupadas per discurrer davart las fatschentas. Quai na plaschevia betg a tut ils umens. «A nus dunnas è quai dentant stà pulit tuttina» menziuna Ida Derungs.

Partidas da dunnas han duvrà pli ditg

Il 1983 – pia 12 onns suenter l'introducziun dal dretg d'eleger per dunnas – è la partida da dunnas cristiandemocratica (PCD) vegnida fundada. E trais onns pli tard ha la partida liberaldemocratica tratg suenter. Il 1986 è la partida da dunnas da la PLD Grischuna vegnida fundada. La finamira clera da questas partidas era da rinforzar las opiniuns e da s’engaschar spezialmain per las dunnas.

Presidentas dal Cussegl Grond

Avrir la box Serrar la box
  • 1986 - Ida Derungs (PCD)
  • 1999 - Sina Stiffler (PLD)
  • 2006 - Agathe Bühler-Flury (PLD)
  • 2010 - Christina Bucher-Brini (PS)
  • 2012 - Elita Florin-Caluori (PCD)

Emprima dunna sco pli auta grischuna

Avant 30 onns, il 1986, ha Ida Derungs procurà per la proxima premiera. Ella è vegnida emprima presidenta dal Cussegl Grond en il chantun Grischun ed uschia la prima pli auta GrischunA. I saja vegnì guardà spezialmain «sin la detta» ad ella. Il squitsch saja stà pli grond.

Buc tut la glieud ha gì plaschair ch'ina dunna era la pli auta Grischuna. Ils blers resuns sajan dentant era quella giada stads positivs. Ils blers hajan propi stustegnì che las dunnas fetschian uss era politica, declera la dunna da 84 onns che abita a Cuira.

video
Dunnas en la politica era insatge nunusità
Or da RTR dals 22.11.2016.
laschar ir. Durada: 34 Secundas.

Fin oz èn tschintg dunnas stadas presidentas dal Cussegl Grond. Tschintg en 30 onns dapi l'onn da presidi dad Ida Derungs ed era tschintg en ils 45 onns dapi il dretg da vuschar per dunnas en Svizra.

Artitgels legids il pli savens