Siglir tar il cuntegn

Header

Navigaziun

Klaus Schwab, il fundatur dal WEF, durant ses pled final dal WEF 2016.
Legenda: Klaus Schwab, il fundatur dal WEF, durant ses pled final dal WEF 2016. Keystone
cuntegn

Chantun «L'entir'emna è stada paschaivla e ruassaivla»

Il 46avel Forum mundial d'economia WEF a Tavau è istorgia. Per la finiziun ha il fundatur Klaus Schwab engrazià a tuts participants, als organisaturs, a las forzas da segirtad ed a tut ils 3’600 collavuraturs davos las culissas.

Accentuà ha Schwab l'engaschi da las forzas da segirtad che hajan - malgrà in privel pli aut - pir pussibilità l'inscunter.

Mesiras da segirtad èn stadas effectivas

In facit positiv dal WEF tiran er las autoritads grischunas. Ellas accentueschan il tema segirtad e communitgeschan ch’i n’ha dà nagins incaps che fissan stads relevants per la segirtad dal forum. Sulettamain tschintg schuldads han stuì ir a chasa pervi ch'els avevan consumà drogas

En pli èn ils polizists e schuldads stads pli visibels, sco il president da la regenza grischuna, Christian Rathgeb declera. La populaziun indigena haja dentant acceptà la situaziun a fitg buna moda e maniera, scrivan las autoritads. Quants policists ch’eran en acziun a Tavau na vegn betg communitgà; cler è, ch’els èn vegnids sustegnids da radund 4’500 schuldads.

L'entir'emna è stada paschaivla e ruassaivla.
Autur: Regenza grischuna

Er constatescha la regenza grischuna, ch’il congress è stà frequentà fitg bain. Uschia han il president Christian Rathgeb ed auters commembers da la regenza grischuna pudì s’inscuntrar cun represchentants da l’economia e cun commembers da regenzas d’auters chantuns sco er da la Confederaziun.

Policists e demonstrants durant la demonstraziun anti-WEF «Wipe Out WEF».
Legenda: Policists e demonstrants durant la demonstraziun anti-WEF «Wipe Out WEF». Keystone

Demonstraziun cunter WEF a Zug

Curt avant ch'il Forum mundial d'economia a Tavau è ì a fin han numerusas persunas demonstrà en la citad da Zug cunter l'occurrenza a Tavau. Tenor la polizia chantunala da Zug sajan radund 200 persunas sa participadas a la demonstraziun cunter il WEF.

Organisà la demonstraziun betg lubida aveva l'allianza anti-WEF. L'allianza na crititgescha betg il WEF sco occurrenza, mabain il sistem chapitalistic che tiria ils fils al WEF, uschia ils organisaturs da la demonstraziun.

RR novitads 17:00