Siglir tar il cuntegn
cuntegn

Chantun «L'economia cumonda diraglia»

In comité grischun cunter l'iniziativa per l'abandun da l'energia atomara ha preschentà ils arguments per in na ils 27 da november. Il comité sa cumpona d'exponents da partidas burgaisas e da l'economia, tranter els era cusseglier naziunal Martin Candinas.

Pliras persunas vid ina maisa
Legenda: Cusseglier naziunal Martin Candinas (san.) ed ulteriurs commembers dal comité grischun cunter l'iniziativa per l'abandun da l'energia atomara. RTR, Gion Gieri Flepp

Tar in gea a l'iniziativa dals Verds stuess fin l'onn 2029 vegnir remplazzada bun 40% da l'electricitad che vegn producida ozendi da las ovras atomaras en Svizra. Quai manass tenor il comité grischun cunter l'iniziativa:

  • ad ina pli gronda dependenza da l'exteriur
  • la segirtad dal provediment d'electricitad patiss
  • e la finala vegniss pervi dal bass pretsch importà electricitad che vegn d'autras ovras atomaras u d'ovras da charvun da la Germania.

Tenor Martin Candinas n'èn tant impressaris sco era consuments d'electricitad betg simplamain pronts da pajar dapli per energia schubra. La finala cumondia l'economia e lura n'emportia quai betg danunder che l'electricitad vegnia.

Perquai vesa il comité grischun cunter l'iniziativa la soluziun en la strategia d'energia 2050 da la Confederaziun. Era quella prevesia d'extrar or da l'energia atomara, dentant uschia che l'energia che crodia davent pudess vegnir remplazzada cun energia regenerabla da la Svizra.

Grischun na profitass betg

Er cun tschentar giu tut las ovras atomaras na s'auzass il pretsch per l'electricitad betg uschè fitg che las ovras idraulicas profitassan. Il pretsch d'electricitad na vegnia betg fatg en Svizra, mabain sin la fiera europeica, è l'avis dal comité grischun cunter l'iniziativa.

Nagin avantatg per il Grischun vesa il comité er en il fatg ch'ils gestiunaris da las ovras atomaras pretendessan milliardas sco reparaziun dal donn, sche las ovras vegnissan messas giu pli baud che quintà. Quai cunzunt areguard il fatg che las ovras tutgan per part als chantuns da la Bassa, e lezs na fissan sut questas circumstanzas betg pronts da sustegnair tuttina u pli fitg ils chantuns da muntogna.

RR novitads 17:00