Siglir tar il cuntegn

Header

cuntegn

Chantun «L'agid per requirents d’asil» è cuntenta cun lavur dal chantun

Il chantun vegn adina puspè critica per la politica d’asil. El mument ston els cun grond squitsch chattar novas dimoras per requirents d’asil. Cun ils centers en Val Müstair, a Mustér ed a Trimmis ha il chantun preschentà questa emna trais novas dimoras.

La communicaziun è savens a curta vista, la populaziun vegn infurmada memia tard ni sco a Val Müstair per suenter ch’ils emprims requirents en schon arrivads. La critica vegn savens da la populaziun u da las autoritads da las vischnancas pertutgadas. Dad autra opiniun è l’uniun «agid per requirents d’asil» ella è cuntenta cun la lavur dal chantun.

Cuntent, dentant tuttina puncts da critica

L’uniun ha adina puspè crititgà las decisiuns dal chantun. Oravant tut en connex cun il center minimal a Waldau han els adina puspè confruntà ils responsabels. Las dimoras a Trimmis e Mustér en betg pli sutterranas e perquai acceptablas per l’uniun. Quai conferma il president Gustav Ott. Dentant ha l’uniun anc adina in pèr puncts ch’el vuless megliurar en futur. Per exempel duessan famiglias pudair bandunar pli baud ils centers da transit, per ch’ils uffants pon ir en scolas publicas e betg pli en scolas dils centers. L’uniun è era dil avis ch’il chantun duess lubir la dimora tar privats. Quai fiss oravant tut per requirents d’asil senza accumpagnament ina buna schliaziun.

La collavuraziun funcziuna

La collavuraziun da l’uniun cun il uffizis responsabels funcziuna. A pliras sesidas durant l'onn barattan els infurmaziuns e l’uniun po deponer lur observaziuns e criticas. Quellas criticas vegnan resguardadas e discussiunadas. Igl uffizi da migraziun sustegn l’uniun che lavura independentamain. Quai n’è betg adina stà il cas. Pli baud n’è l’opiniun da l’uniun betg vegnida resguardada ed ins n’ha betg chattà tanta suatientscha per ils dretgs dals requirents d’asil sco oz.

Artitgels legids il pli savens