Siglir tar il cuntegn

Header

Navigaziun

Ina bova ch'aveva fatg sviar in vagun da la Viafier retica tranter Casti e Solis.
Legenda: Ina bova aveva fatg sviar in vagun da la Viafier retica tranter Casti e Solis. Keystone
cuntegn

Chantun L'accident dal 2014 n'era betg prevesibel

L'accident d'in tren da la Viafier retica avant dus onns e mez a Casti n'è betg stà d'evitar. Quai mussa il rapport final dal SUST - il post svizzer ch'examinescha accidents da traffic. Quai che pertutga la rait da communicaziun datti dentant basegn d'agir.

Cunquai ch'i na saja anc mai vegnì giuado ina bova en quest lieu tranter Tusaun e Casti, na saja l'accident betg stà prevesibel, hai num en il rapport. Era uschiglio haja la Viafier retica fatg tut endretg: Pir duas uras e mez avant l'accident aveva in controllader examinà las rodaglias sin il traject, il tren n'era betg memia spert, ha franà ad uras ed ils emploiads hajan reagì professiunal.

Problem cun rusnas da communicaziun

Il rapport fa dentant attent sin in problem che la Viafier retica duai tegnair en egl: Durant l'accident n'èsi betg stà pussaivel da clamar immediat agid e quai pervia d'ina rusna en la rait da communicaziun.

Quai veglia el examinar e megliurar, ha ditg Stefan Engler, president dal cussegl d'administraziun da la Viafier retica, sin dumonda dad RTR. El fa dentant attent ch'i saja grev d'avair adina e dapertut ina colliaziun da communicaziun en las valladas grischunas.

Tar l'accident l'avust 2014 eran 16 persunas vegnidas blessadas - in um è silsuenter mort en l'ospital. Capità era l'accident perquai ch'ina bova aveva cuvert las rodaglias e sinaquai eran plirs vaguns ids sur ils binaris.

RR novitads 14:00