Siglir tar il cuntegn
Inhalt

Chantun Knuchel refusa renfatschas envers l'uffizi da construcziun bassa

L'uffizi chantunal da construcziun bassa ha concedì d'avair survegnì il 2009 infurmaziuns davart in cartel en l'Engiadina. Ils documents sajan però stads memia vegls, uschia Reto Knuchel da l’uffizi da construcziun bassa envers RTR. Tuttina è in post extern vegnì incumbensà d'intercurrir il cas.

Portrait da Knuchel.
Legenda: L'affera da cartels en l'Engiadina metta era sut squitsch l'uffizi da construcziun bassa. Ils responsabels eran infurmads. MAD

Ils documents ch’il infurmant Adam Quadroni ha surdà a l’uffizi sajan stà 10 onns vegls, ed uschia memia vegls.

Tenor las enconuschientschas da lura è l’uffizi da construcziun bassa vegnì tar la conclusiun ch’i na dettia betg avunda indizis da instradar ulteriurs pass. Cunzunt pervia da la vegliadetgna dals documents.
Autur: Reto KnuchelUffizi da construcziun bassa

L’uffizi haja dumandà per documents pli actuals, dentant mai retschavì quels. Perquai haja l’uffizi decidì da lez temp, da betg persequitar vinavant las renfatschas. Uschia n’hajan ins era betg infurmà il cusseglier guvernativ Stefan Engler, che manava lura il departament da bajegiar.

Infurmaziuns davart projects gia enconuschentas avant la publicaziun

In’autra renfatscha envers l’uffizi da construcziun bassa ha la NZZ am Sonntag fatg dumengia passada: Tenor la gasetta sajan las lavurs gia stadas enconuschentas avant ch’il chantun haja insumma scrit ora questas. Schebain quai correspunda a la vardad n’è il mument betg cler.

Reto Knuchel fa attent, ch’i vegniva da quai temp publitgà en il messadi da budget cifras detagliadas tar ils projects. Uschia eran las cifras tar ils projects gia enconuschentas a las fatschentas avant che las lavuras vegnivan scrittas ora.

Post extern examinescha il cas

In post extern examinescha ils process da surdadas da lavurs ed ils contacts da l’uffizi da construcziun bassa tar la branscha da bajegiar. Era las renfatschas davart l’inscunter cun Adam Quadroni l’onn 2009 prenda quest post extern sut la marella.

RR novitads 06:00