«Jau stun per sinceradad, patriotissem e liberalissem»

El è giuven, sportiv ed ha grondas ambiziuns: Luca Heinrich, l’unic candidat da la novfundada Partida dals democrats patriotic-liberals. A las elecziuns naziunalas ils 18 d’october spera il gimnasiast da Tavau da pudair far cun sia glista 2’000 fin 3’000 vuschs.

Luca Heinrich da Tavau ha fundà sia atgna partida: La Partida dals democrats patriotic-liberals.

Legenda da maletgs: Luca Heinrich da Tavau ha fundà sia atgna partida: La Partida dals democrats patriotic-liberals. RTR, G. Caviezel

Per el saja quai sco giuven debutant da 18 onns cun ina nova partida bain grev da dir quantas vuschs ch’el fetschia a las elecziuns naziunalas ils 18 d’october: «Jau sun gia cuntent sche jau fasch persunalmain 1’000 vuschs», di Luca Heinrich che fa a Tavau il gimnasi da sport. «Cun las vuschs da la glista vegnin nus sin forsa 2’000 fin 3’000 vuschs. Ina finamira optimistica, dentant cuntanschibla.»

Gidar a la PPS

E gea, las schanzas sajan bain pitschna, dentant forsa possia el era gidar in zichel a la PPS da recaltgar in ulteriur sez en il Cussegl naziunal cunquai ch’el ha ina colliaziun da glista cun la Partida populara.

Magdalena Martullo-Blocher fiss per el en mintga cas ina buna Cusseglier naziunala per il Grischun, era sch’ella è Turitgaisa. Quai che fetschia tant pli grev ses cumbat electoral, pertge che blers Grischuns na vesian ella betg sco ina da lurs. «Ella ha en mintga cas ina fitg auta cumpetenza economica e pudess represchentar fitg bain la plazza economica grischuna a Berna», manegia Luca Heinrich.

Nagina era la dretga

La raschun daco ch’el na candidescha betg per la PPS e ch’els han insumma fundà ina nova partida è simpla: «I na deva nagina che steva per las nossas valurs.» La PPS saja stada memia conservativa en tscherts puncts e la PLD, la partida nua che sia mamma era activa, lezza saja memia pauc patriotica per el. E perquai sajan els sa decidì da fundar in’atgna partida, la Partida dals Democrats patriotic-liberal. «Ina PPS liberala ubain ina PLD patriotica», uschia Heinrich.

Segn per la giuventetgna

Ch'els han fundà ina atgna partida e ch'el candidescha per il Cussegl naziunal, n’haja dentant betg mo da far ch'el n’haja betg chattà ina partida che represchenti consequentamain sias valurs. La fin finala saja l’entira acziun era in segn per la giuventetgna: «Jau hai numnadamain vulì mussar ch’in po gia cun 18 onns furmar in’atgna partida ed iniziar ina candidatura per il Cussegl naziunal a Berna ed uschia era cuntanscher insatge.»

Nus charezzain noss pajais

El stettia per sinceradad, patriotissem e liberalissem e represchentia ina partida che charezzia la Svizra che veglia mo il meglier per il pajais. La Partida dals democrats patriotics saja ina partida che represchentia las valurs svizras ch’èn tenor el tranter auter: «La libertad da mintga singul e dal pajais, la democrazia directa sco crap da fundament per noss svilup, ina economia da martgà uschè libra sco pussibla, la libertad da manifestar l'atgna opiniun, la buna furmaziun ch’i dovra per la bainstanza da la Svizra e la segirtad entras ina buna e moderna armada.»

«Quai s'auda er tar in cumbat electoral»

Temps da far cumbat electoral, gliez ha Luca Heinrich en mintga cas avunda il mument sco quai ch’el di. Pertge il gimnasiast che dat en sasez hockey tar ils juniors dal HCD, patescha suenter 3 mais anc adina in zichel da la malsogna da Pfeiffer, uschia che la stagiun da hockey è per el pli u main gia a fin.

Ils resuns sin sia candidatura sajan per la gronda part fitg positivs. Natiralmain dettia quai era ina u l'autra vusch critica: gea schizunt in u l'auter da ses placats che pendan a Tavau, sajan vegnids ruts e tschufragnads da vandals, dentant quai s'audi tar in cumbat electoral.

La nova partida

La Partida dals democrats patriotic-liberals han dus gimnasiasts da Tavau fundà. Fin ussa ha ella 10 commembers. La partida politisescha dretg dal center tranter la PLD e la PPS ed è tenor ils fundaturs: ina «PLD patriotica ubain ina PPS liberala». Ses unic candidat per las elecziuns naziunalas è il confundatur Luca Heinrich.