Robert Grossmann n'è schon plirs onns betg stà en ils Stadis Uni da l’America. Ma sch’el auda ils nums Donald Trump e Hillary Clinton, sche lura è el trumpà ed era vilà che l’America n'è betg stada abla da preschentar dus candidats da vaglia.
Jau hai absolutamain nagina fidanza en quest dus candidats.
Nagina simpatia per omadus candidats
Il republican Donald Trump saja ina persuna uschè extrema e conservativa. Uschè ina persuna na dastga vegnir president, di Robert Grossmann. In exempel saja il mir che Trump less bajegiar sin ils cunfins cun il Mexico.
Ma era la democrata Hillary Clinton na persvada insumma betg il scolast da musica. Era lezza haja gia procurà per scandals. Per exempel, il scandal dad e-mails. Clinton haja mai propi raquintà la vardad en chaussa.
Ina chaussa che disturba Robert Grossmann vid omadus candidats è la vegliadetgna Clinton ha 68 onns e Trump 70 onns. Optimal fissi in candidat enturn ils 50. Las pretensiuns tar quest post sajan uschè autas e chaschunan bler stress. E cun bun 70 onns na sajan ins pli adattà per il post sco president dils Stadis Uni.