Siglir tar il cuntegn

Header

cuntegn

Irun grisch Renfatscha ch’il Grischun sajettia illegalmain l’utschè

Ils davos quatter onns ha il chantun Grischun sajettà senza lubientscha 75 iruns grischs – in utschè protegì. Il Tribunal federal haja gia constatà avant tschintg onns che quai cuntrafetschia a la lescha, scriva BirdLife Svizra. L'Uffizi da chatscha e pestga sa defenda dentant.

Tenor la lescha federala dovri ina lubientscha per sajettar spezias d’animals protegidas. Quai ha era il Tribunal federal confermà l’onn 2015. Malgrà ch’il Grischun e tut ils auters chantuns han lura survegnì ina directiva da l’Uffizi federal per l’ambient – cuntinueschia il Grischun cun sia pratica da sajettar iruns grischs. Quai scriva Birdlife Svizra, l'Associaziun svizra per la protecziun dals utschels.

La regenza grischuna ha concedì sin ina dumonda or dal Cussegl grond, ch’il chantun ha er il 2019 puspè sajettà otg iruns. Atgnamain stuess il chantun mussar si, ch’ils iruns grischs han fatg donns considerabels, e relaschar ina disposiziun publica.

Tenor BirdLife Svizra na sa tegnan er quatter ulteriurs chantuns anc adina betg vid la lescha federala.

L'uffizi da chatscha e pestga sa defenda

L'Uffizi da chatscha e pestga sa defenda cunter la renfatscha da Birdlife, ch'ins haja sajettà sur onns illegalmain l'irun grisch – ch'è in utschè protegì. 49 dals 75 utschels che sajan vegnids sajettads ils davos 4 onns, sajan vegnids sajettads durant il temp transitoric, cura che quai saja anc stà lubì. Il sbagl ch'il chantun haja fatg saja, ch'ins n'haja betg annunzià ils ulteriurs iruns grischs sajettads.

audio
Hannes Jenny da l'Uffizi da chatscha e pestga
ord Novitads dals 29.06.2020. Maletg: RTR
laschar ir. Durada: 24 Secundas.

Plinavant sajan ins era stà en retard cun il plan da mesiras ch'ins avess stuì surluvrar. Pir dapi l'emprim da favrer 2020 valia in scumond absolut da sajettar l'utschè protegì.

RTR novitads 09:00

Artitgels legids il pli savens