Siglir tar il cuntegn
cuntegn

Chantun Investir u betg? Cura è in project madir?

Il project «Viols» cun hotel ed abitaziuns a Savognin ha fatg naufragi, tranter auter perquai ch'el n'era tenor l'investur betg madir. La dumonda cura ch'in project è madir dependa fitg da la tenuta persunala da l'investur. E tuttina datti criteris, p. ex. economics, per u cunter l'investiziun.

Extracts da las visualisaziuns dals projects «Viols» a Savognin e «Pradas» a Breil.
Legenda: Il project «Viols» a Savognin (san.) ha fatg naufragi - il project «Pradas» a Breil è gia bajegià. mad

Radund 60 milliuns vul Markus Weber, il president dal cussegl d'administraziun da las pendicularas Mustér investir en il ressort da vacanzas che vegn bajegià gist dasper la staziun a val. Per el sto il quint ir si economicamain er a lunga vista.

I sto vegnir elavurà il cash-flow necessari per pudair finanziar las renovaziuns ed uschia manar ina fatschenta sauna a lunga vista.
Autur: Markus Weberinvestur

Investiziuns per motivs persunals, p. ex. il plaschair da construir in grond hotel cun ina abitaziun per sasez enstagl da cumprar insanua ina villa per plirs milliuns francs, talas investiziuns na fan tenor Markus Weber betg senn. Anzi, ellas fetschian savens donn a las fatschentas tradiziunalas da famiglia che stoppian cumbatter per mintga rap.

Investar là nua ch'il quint va si economicamain er a lunga vista, ina tenuta che er Norbert Candinas parta. El è gia dapi passa 40 onns en la branscha da construcziun ed ha gia realisà blers projects sco investur ma er sco sviluppader. Principalmain chasas, abitaziuns da vacanzas ma er surbajegiadas da fatschenta. Tar Norbert Candinas datti dentant er tschels projects. Projects nua ch'i va en emprima lingia per l'architectura, l'artistica e pir suenter per la rendita.

Project na sto betg esser planisà dad a fin z per investir

Omadus investurs gidan pli gugent a sviluppar in project che investir en in project finì dal tuttafatg. En ils pli blers cas na correspundian ils projects anc betg a las atgnas ideas u a la filosofia da fatschenta, dian omadus investurs. Ina giada sajan aspects economics betg resguardads avunda u lura in'autra giada aspects dal bajetg sez.

Criteris che pon influenzar negativamain la dumonda sch'i dat daners u betg èn:

  • la situaziun economica sa mida (p. ex. cura che la Banca naziunala svizra ha schlià il curs minimal da l'euro)
  • l'investur è frustrà pervi da la collavuraziun cun uffizis, reglas e normas cumplitgadas
  • durant la fasa da planisaziun sa mussi ch'il project na po betg render

In boom da ressorts en il Grischun

Ressorts da vacanzas paran en moda. Ils davos onns hai dà numerus projects da ressorts da vacanzas. Blers projects èn vegnids realisads, in u l'auter è anc en realisaziun, i dat dentant era ressorts ch’èn mai vegnids bajegiads.

RR actualitad 12:00