Siglir tar il cuntegn
cuntegn

Chantun Insects sin noss plat

Dapi il prim da matg èn lubidas en Svizra trais sort d’insect sin noss tagliers. Dentant en vendita n'èn anc uss en l’entira Svizra nagins insects. L'emprim dovri numnadamain differentas lubientschas.

Legenda: Guardar il video Seria Insects sin il taglier – ils uffizis han in pled en chapitel. Durada 03:59 minutas.
Or da Telesguard dals 17.05.2017.

Magliar insects n’è betg problematic

Il grigl, il salip ed il verm da farina èn ils trais insects ch’han chaschunà in mantun lavur supplementara a Silvio Arpagaus. Avant che pudair far las emprimas controllas dals insects, ha el stuì sa leger tras in’entira pluna litteratura scientifica sur dals trais cumpogns. Uss san el e ses team intercurir ils insects sin elements toxics, e quai avant che quels sa tschentian sin noss tagliers. Dubis da magliar insects na ston ins tenor Silvio Arpagaus betg avair, ord vista scientifica na dettia quai nagins motivs da betg magliar quels insects. Els cuntegnan blers vitamins, proteins custaivels e differentas substanzas mineralas. Sin l’entir mund maglian radund duas milliardas carstgauns regularmain insects. Bun 2'000 spezias èn mangiablas.

Rimnar insects en la natira è dentant problematic

Schegea ch’ins chatta ils insects en la natira, è la tratga fitg pretensiusa e dovra bler inschign. Rimnar salips, grigls e verms en la natira n’è tenor Silvio Arpagaus pervia da bacterias e pesticids betg la meglra idea. Perquai èsi il mument meglier da spetgar, fin che la vendita dad insects è lubida en Svizra. Cura che quai vegn ad esser il cas, n’è il mument betg cler. Ils grigls vegnan a custar bun 120 francs il kilo, ils salips 160 francs ed ils verms 30 francs.