Siglir tar il cuntegn
cuntegn

Chantun Inscunter dals presidents da la PCD

L'emprima preschentaziun publica dal nov president da la PCD Svizra Gerhard Pfister è stada en il Grischun. Sin invit da la PCD 60plus è el vegnì a Cuira. Er da la partida, il nov president da la PCD giuvna Svizra Tino Schneider. E tge pon ils giuvens emprender dals pli vegls?

Tino Schneider e Gerhard Pfister
Legenda: Tino Schneider e Gerhard Pfister, ils presidents da la PCD giuvna e da la PCD Svizra. RTR, S. Bundi

La PCD Svizra possia emprender da la PCD giuvna l'engaschament, la PCD giuvna da la PCD la vista globala. Quai dian Gerhard Pfister, il nov president da la PCD Svizra e dapi 13 onns cusseglier naziunal dal chantun Zug, e Tino Schneider, il deputà Grischun dapi l'onn 2014 e president da la PCD giuvna Svizra. Tips n'ha Pfister dentant betg per ils giuvens, els fetschian tut endretg. Il giuven Schneider ha sco tip per Pfister, da tegnair la dira.

Insumma, en quai inscunter han els quasi be cumpliments in per l'auter - almain davant il microfon. Er en la dumanda, che ch'il «C» da la partida cristiandemocratica muntia per els, na vegnan els betg els chavels in a l'auter. Els dattan omadus respostas fitg humanisticas, quasi respostas sco ord las statutas: «Il C munta per mai dignitad umana, libertad e valurs», di Gerhard Pfister. Tino Schneider aschunta: «Per mai munta il C maniera, giustia e convivenza.» Pia, las differenzas tranter la partida-mamma e la partida dals giuvens n'èn betg uschè grondas.