Siglir tar il cuntegn
cuntegn

Chantun Iniziativa da linguas estras ha vigur legala

Il Tribunal federal a Losanna ha decis che l’iniziativa da linguas estras dal Grischun è cumpatibla cun il dretg superiur. Quai cun 3:2 vuschs. Cun questa sentenzia suonda il Tribunal federal a la sentenzia da la Dretgira administrativa dal Grischun.

Ina stanza da scola.
Legenda: En las stanzas da scola dal Grischun duai vegnir instruì ina lingua estra en scola primara. L'iniziativa ha vigur legala. Keystone

Sco proxim vegn la regenza a far in messadi sbassond sin las sentenzias dal Tribunal federal e la Dretgira administrativa grischuna. Alura vegn il Cussegl grond a stuair debattar davart l’iniziativa. Refus el quella e fa tut tenor ina cuntraproposta alura ha il pievel grischun l’ultim pled en chapitel.

Il Tribunal federal refusa il recurs dals adversaris

Legenda: Guardar il video Iniziativa per mo in lungatg en primara è valaivla. Durada 03:23 minutas.
Or da Telesguard dals 03.05.2017.

Dubis davart la realisaziun da l’iniziativa na tanschian betg per declerar ina iniziativa sco nunvalaivla, declera il Tribunal federal. Represchentants dal rumantsch e talian avevan fatg recurs tar il Tribunal federal.

La minoritad dal Tribunal federal aveva argumentà ch'il scumond da discriminaziun na vegnia betg resguardà. L'iniziativa offendia er la constituziun grischuna che di che las trais linguas, rumantsch, tudestg e talian sajan egualas. Fertant che las duas linguas en la minoritad ston numnadamain emprender la lingua ferma, il tudestg, pon ils tudestgs emprender vinavant englais. Uschia han ils tudestgs quatter onns avantatg sin ils rumantschs ed ils talians.

Sulet ina lingua estra en scola primara

Ils iniziants vulan ch’i vegnia be pli instruida ina lingua estra en la scola primara. En las regiuns rumantschas e talianas dal chantun vegniss uschia be pli instruì il tudestg. Ed en las regiuns tudestgas l’englais.

La dretgira administrativa aveva decidì che l'iniziativa saja valaivla. Quella dretgira aveva argumentà sia decisiun uschia che quella sa refereschia be sin ils roms da scola obligatorics. Las scolas possian uschia anc adina far a mogna ulteriurs roms.

 

Ord l'archiv

RR actualitad 06:00+