Siglir tar il cuntegn

Header

Baud la damaun, il tschiel è blau-rosa, dus chatschaders miran tras lur perspectiv
Legenda: L'iniziativa cunter la chatscha speziala n'ha gì nagina schanza. Keystone
cuntegn

Chantun Iniziativa cunter la chatscha speziala è e resta nunvalaivla

La Dretgira administrativa grischuna ha confermà che l'iniziativa da chatscha speziala saja nunvalaivla.

L'onn passà ha il Cussegl grond declerà nunvalaivla l'iniziativa, e quai cun gronda maioritad. La Dretgira administrativa conferma uss questa decisiun e refusescha uschia il recurs ch'il iniziants avevan inoltrà.

Tge vuleva l'iniziativa

Ils iniziants vulevan abolir la chatscha speziala e limitar la chatscha a maximalmain 25 dis entaifer ils mais da settember e d'october (chatscha auta). Durant la deliberaziun da l'iniziativa ils 9 da favrer 2015 ha il Cussegl grond constatà ina violaziun evidenta dal dretg surordinà ed ha perquai declerà l'iniziativa sco nunvalaivla e quai cun 79 cunter 36 vuschs.

Dretgira è dal maini dal Cussegl grond

La Dretgira administrativa vegn a la medema conclusiun en sia sentenzia. Cun scumandar da far chatscha sin la selvaschina suenter la chatscha auta na possian las finamiras fixadas en il dretg federal respectivamain en la lescha federala da guaud per evitar donns da selvaschina betg pli vegnir cuntanschidas. Questa constataziun sa basa tranter auter sin in'expertisa da biologs da selvaschina, la quala la regenza ha ordinà suenter l'inoltraziun da l'iniziativa.

Il commember dal comité d'iniziativa, Renatus Casutt, ha confermà envers RTR ch'ils iniziants veglian trair vinavant questa sentenzia.

RR novitads 12:00