Siglir tar il cuntegn

Header

Il controllader Andreas Cadonau cun il pur Lucas Tomaschett
Legenda: Er controllads vegnan per exempel ils tractaments dal veterinari ed auters documents. RTR/G. Gabriel
cuntegn

Chantun Ina giada per adina – betg cun bio

Cura ch'in bain puril ha fatg la midada da la producziun convenziunala a la producziun biologica n'ési anc betg finì cun las controllas. Almain ina giada ad onn succeda ina controlla annunziada e pliras giadas ad onn er controllas spontanas. Ma co succeda usché ina controlla insumma?

Sco emprim dettia el adina in'egliada sin ils animals, declera Andreas Cadonau, ch'è gia dapi set onns controllader da bio en la Surselva. «Jau guard co els vesan ora, sch'els èn nutri bain e sch' els èn schubers. Er impurtant è ch'i n'haja betg dapli animals che quai ch'i ha plaz ed er ch'els pon ir giuadora regularmain.» Silsuenter controllescha Cadonau er il plaz ordadora. Quel sto esser schubers e la puschina chanalisada endretg. Lura na dastga il pavel secapescha betg esser sprizzà. La stad giaja el adina anc a controllar las pradas.

Nagins taurs che derivan dad embryotransfer

Sche la controlla è annunziada, suonda anc ina controlla en biro. I vegnia per exempel guardà quant bler che las vatgas pasculeschan, declera Cadonau. Er documentar stoppian ils purs il manar. «Uschia sa vegnì controllà, ch'ei na vegnia betg duvrà taurs dad embryotransfer.» Era ils tractaments dal veterinari e las cumpras dal pavel, sal ni strom sto il pur mussar al controllader.