Siglir tar il cuntegn

Header

cuntegn

Chantun In zic Tatort era en il Grischun?

La sonda ha l’ospital chantunal envidà ad in di da portas avertas. Tranter auter han ins pudì tadlar referats davart la medischina forensica (Rechtsmedizin). Medis forensics enconuschan ils blers mo ord serias da crimi sco NCIS u il Tatort.

A l’entschatta dad in’episoda capita in mortori. Ma grazia als medis forensics èsi savens nagin problem da chattar il delinquent e d’eruir, cura ch’il mortori è capità. Uschè simpel n'èsi dentant betg, declera Daniel Wyler, manader da la medischina forensica en l’ospital chantunal a Cuira. «En las serias ed en ils crimis vegnan ils medis mussads sco surumans». Quai constettia natiralmain betg.

Medis forensics n'èn betg titulars dal Premi Nobel che vegnan da schliar mintga cas.
Autur: Daniel Wyler manader medischina forensica en l'ospital chantunal a Cuira

Medis forensics in zic spezials?

Spezials sajan els segir, manegia Daniel Wyler. Uschiglio na lavurassan nus betg sco medis forensics. En televisiun vegnan els dentant gugent mussads sco freaks che han savens in dischurden e fiman a la plazza da lavur. Quai na saja definitiv betg uschia.

L'examinaziun da baras è mo ina pitschna part dals medis forensics en l'ospital chantunal a Cuira
Legenda: L'examinaziun da baras è mo ina pitschna part da la lavur dals medis forensics en l'ospital chantunal a Cuira. Keystone

Mintga di vid examinar baras?

En ils crimis èn ils medis adina vid examinar baras. En realitad è la lavur in zic autra. Varga il dubel da las persunas che nus examinain èn persunas che vivan e betg persunas mortas, di Daniel Wyler.

Tuttina na saja quai ch'ins vesia en la televisiun betg fallà. I vegnia simplamain simplifitgà tut e mussà, quai ch’il public veglia vesair.

RR actualitad 06:00

Artitgels legids il pli savens