Siglir tar il cuntegn
cuntegn

Chantun In zic damain dischoccupads il december

Il december eran en il chantun Grischun 2‘115 persunas senza lavur, quai ch’è ina quota da dischoccupaziun da 1.9%. Cumpareglià cun il mais avant cun 2'158 dischoccupads è il dumber sa reducì per 43, scriva l’uffizi per industria, mastergn e lavur dal Grischun.

Esch dad in center per intermediaziun da lavur regiunal.
Legenda: En il Grischun è il dumber da las persunas senza lavur sa reducì il december, quai surtut pervi dal cumenzament da la stagiun d'enviern. Reuters

La reducziun da la quota il december saja d’attribuir al cumenzament da la stagiun d’enviern. Il pli grond dumber da dischoccupads noda la branscha da construcziun (818), la gastronomia (283) sco er il commerzi en detagl (98).

Quota svizra crescha sin 3,4%

En Svizra è la quota da dischoccupaziun creschida il december da 3,2 sin 3,4%, scriva il secretariat statal per economia. Il mais passà eran uschia 147’369 persunas annunziadas tar las centralas d’intermediaziun da lavur regiunalas. Quai èn radund 11’000 dapli dischoccupads ch’il november. Il medem temp da l’onn avant era la quota anc tar 3,5%. Guardà sur l’entir onn 2014 era la quota cun 3,2 % sin il medem nivel sco il 2013.

RR novitads 08:00