25'000 objects datti da scuvrir en l'archiv da maletgs dal Grischun. Il problem è dentant che blers na san betg nua che l'archiv da la fundaziun sa chatta. Perquai datti ina pagina d'internet, in catalog online dals 25'000 objects, guidas ed adina puspè exposiziuns.
Ils objects documenteschan il Grischun, il svilup dal chantun muntagnard, cuntradas e persunalitads impurtantas. Els èn da 5 tschientaners e dals pli differents artists: Il mument vegnan mussads maletgs da Giovanni Giacometti, Turo Pedretti, Alberto Giacometti e Giuliano Pedretti.
Dapli peda per talas acziuns
La figlia dals collectaders, Gada Capaul, è cuntenta cun l'exposiziun e che l'archiv avra uschia sias portas per in public vast. Ussa che tut las ovras sajan inventarisadas, hajan els dapli peda da far talas acziuns. Uschia speria ella che la fundaziun vegnia onn per onn pli enconuschenta.
In lieu ideal per ils maletgs
La fundaziun Capauliana sa chatta en in tschaler sutterran dal Vögele. Far exposiziuns en in tal lieu, cun massa betun, atschal ed portas massivas n'è betg simpel, di era la curatura Chantal Störmer.
L'ovra saja vasta e dovria bler spazi e perquai saja ella er cuntenta d'insumma avair duas stanzas per exposiziuns. E per ils maletgs saja quai in lieu ideal. Il lieu saja climatisà, i na possia betg brischar en las stanzas ed era da l'aua sajan ils maletgs segirs.
Giacometti & Pedretti
L'exposiziun "Giacometti & Pedretti, in'amicizia d'artists sur generaziuns" preschenta dissegns, skizzas e litografias da Giovanni Giacometti, Turo Pedretti, Alberto Giacometti e Giuliano Pedretti. La finamira saja da mussar ils tratgs cumineivels, dentant era las differenzas ed il svilup.