Siglir tar il cuntegn
cuntegn

Chantun In'enconuschenta e trais stailas novas al firmament grischun

Trais restaurants grischuns han survegnì da nov ina staila da la bibla culinarica franzosa Guide Michelin – ed in restaurant ha pudì salvar sias trais stailas. Quai rapporta l’agentura da novitads svizra SDA.

Portrait Caminada.
Legenda: Il signur da las stailas – Andreas Caminada tar ses restaurant da gourmets «Schauenstein» a Fürstenau/Farschno. Keystone

La Svizra resta il pajais il pli stailì al firmament culinaric dal Guide Michelin. En il Guide Michelin Svizra 2018 èn vegnids onurads 118 restaurants cun ina ni pliras stailas da Michelin.

Andreas Caminada resta il star tranter ils locals stailids

La pli gronda staila culinarica grischuna resta Andreas Caminada: Per ses restaurant da gourmets «Schauenstein» a Fürstenau/Farschno riva el da mantegnair il status exclusiv da trais stailas da Michelin. Uschè bun sco el èn mo anc dus auters locals svizzers: Il «B. Violier - Restaurant de l'Hôtel de Ville» a Crissier (VD) ed il «Cheval Blanc by Peter Knogl» a Basilea.

Nov survegn Caminada er ina staila per ses restorant «Igniv» a San Murezzan.

Duas novas stailas cun duas stailas

Tar ils 118 locals svizzers stailids, ch’i dà dapi quest onn, han da nov dus restorants duas stailas – numnadamain il «Einstein Gourmet» a Son Gagl e la «Taverne zum Schäfli» a Wigoltingen (TG).

Stailids èn uss er la «Stiva veglia» ed il «Weiss Kreuz»

Cun la «Stiva veglia» a Schnaus ed il «Weiss Kreuz» a Malans an dus ulteriurs locals grischuns survegnì ina staila. En vischinanza dal Grischun è cun il «Torkel» a Vaduz er in’autra chasa vegnida onurada per l’emprima giada cun ina staila da Michelin.

Ensemen cun els trais èn vegnids onurads ulteriurs 11 restaurants svizzers da nov cun ina staila Michelin. Tut en tut datti uss 96 restaurants svizzers cun questa onuraziun exclusiva da la bibla da gourmets franzosa.

RR novitads 15:00

Il «Guide Michelin»

Logo Guide Michelin.
Legenda: Keystone

Il guid da gastronomia cumpara per 28 pajais. El mesira en tut ils pajais cun ils medems criteris e dà stailas.

* è fitg buna cuschina che merita l’attenziun dal lectur

** è cuschina excellenta che merita ina da sviar da l’agen viadi

*** è ina da las meglras cuschinas – vala in viadi

Uschia laschan sa cumparegliar ils locals sin basa internaziunala.