In egl per il detagl

Dapi il november 2015 è Luzi Bürkli schefredactur dal Bündner Tagblatt. Suenter bundant 2 mais en uffizi po Luzi Bürkli far bliantscha positiva dad in temp intensiv che ha gia purtà diversas sfidas sco las elecziuns dal Cussegl federal e dal Cussegl naziunal.

Luzi Bürkli en redacziun

Legenda da maletgs: Dapi radund 2 mais è Luzi Bürkli la testa publicistica dal Bündner Tagblatt. RTR, F. Caduff

Sco schefredactur è Luzi Bürkli en la situaziun ch'el è ina persuna da la publicitad. Quai maina cun sai la sfida da mussar tar eveniments pli gronds ni tar temas pli cumplexs ch’ins sa da tge ch’ins discurra. Dasper las sfidas persunalas vegnan anc tiers las sfidas da la gasetta.

«  La pli gronda sfida dad ina gasetta ozendi è da far ina gasetta che ha sia giustificaziun, che è exclusiva ed attractiva uschia ch'ils lecturs tegnan nus sur aua. »

Luzi Bürkli
Schefredactur Bündner Tagblatt

Exclusiv dessan era esser las ideas ed ils accents che Bürkli vul dar al Bündner Tagblatt. Per exempel han ins scret ina entira seria cun ina maschina da scriver. Ina chaussa che mo ina gasetta po far.

«  A mai disturba plitost rauba pitschna, sco in sbagl en in text. »

Luzi Bürkli
Schefredactur Bündner Tagblatt

Autras ideas che pertutgan la gasetta en general vul il schefredactur anc elavurar. Ma ina es cler: midar da prinzipi il Bündner Tagblatt na vegn betg en dumonda per Luzi Bürkli. In relaunch da la gasetta haja quai dà avant bundant 2 onns. Vi da quel concept vul Bürkli tegnair ferm.

Biografia curta

Luzi Bürkli (41) lavura dapi 19 onns tar la Somedia, quai dentant cun interrupziuns. El è stà redactur tar Radio Grischa, redactur e producent da la «Bündner Zeitung», redactur da l'intern e da l'extern tar la Südostschweiz e pli tard manader dal ressort regiun. Il 2015 è Bürkli turnà sin la redacziun dal Bündner Tagblatt. L'emprim ha el lavurà en la redacziun ed il november è el daventà successur da Larissa Bieler sco schefredactur. Bieler aveva demissiunà e midà tar Swissinfo a Berna.

RR Actualitad mezdi 11:00