Siglir tar il cuntegn

Header

cuntegn

Chantun In capricorn duai far onur a trais fieras da Cuira

Per la novavla giada surdat Cuira Turissem il «Premi da Valurisaziun». Quest'onn a las trais fieras da Cuira: la fiera da Nadal, la fiera dal bambin ed a la fiera emnila.

Premi da Valurisaziun

Avrir la box Serrar la box

Cuira Turissem surdat mintg'onn il Premi da Valurisaziun per far onur ad organisaziuns, interpresas e persunas che han ina muntada turistica, economica u sociala per Cuira. Tgi che survegn il premi decida la suprastanza da Cuira Turissem senza in proceder da candidatura.

A Cuira datti durant l'entir onn differentas fieras. Las pli enconuschentas e tradiziunalas èn la fiera emnila e la fiera da Nadal che festiveschan quest onn gia lur giubileum da 30 onns. Dapi tschintg onns fa era la fiera dal bambin part a las fieras dal temp d'advent da la citad.

Mintgina cun agen scharm

Mintgina haja ses agen scharm e sias atgnas fermezzas, uschia Cuira Turissem. La spezialitad da la fiera da Nadal e la fiera emnila saja la regiunalitad. Il pulschain tranter las fieras premiadas possia sa far valair entras l'attracziun turistica e carmalia uschia mintg'onn giasts naziunals ed internaziunals.

Dapli valur per Cuira

L'aspect communabel da las trais fieras saja dentant lur valurisaziun per la chapitala grischuna: Tuttas trais fieras sustegnian las pussaivladads da far fatschentas per ils affars en la citad e procurian per pernottaziuns. Per far onur a quai han il president da Cuira Turissem Rico Monsch e la directura da Cuira Turissem surdà in capricorn simbolic als comités d'organisaziun da las trais fieras.

RR novitads 14:00

Artitgels legids il pli savens